Accessibility links

якшәмбе, 4 декабрь 2016, Казан вакыты 09:07

Ulyan ölkäsennän Qazanğa säyäxätlär arta bara


Ölkäneñ iñ uñğan ana tele uqıtuçılarınnan berse Älfiä Alimova yıl sayın märkäzebez Qazanğa üz uquçıları belän säyäxätlär oyıştıra. Bıyılğı säyäxättä isä Älfiä xanım üz mäktäbe uquçıları belän genä çiklänmiçä, Çardaqlı rayonınıñ barlıq tatar awılları mäktäpläre uquçıların da cälep itkän.

Älfiä Alimova küp yıllar inde rayon buyınça ana tele uqıtuçılarınıñ metodik berläşmäse citäkçese bulıp ta tora. Bıyılğı ike oluğ yubileyğa bağışlanğan çaralar, näq anıñ tırışlığı arqasında, awıllarda ğına tügel, rayon külämendä dä kiñ bilgelänep ütte. Yaña Qızılsu häm Abdulla awıllarında uzğannar bu çaralar. Häm näq şul yubileylar çaralarında iñ aktiv qatnaşqan balalarğa büläk sıyfatında oyıştırılğan bıyılğı säyäxät.

Älbättä, barlıq balalarnı da ber avtobusqa sıydırıp bulmıy, şunlıqtan qayberlärendä kimsenü xisläre tuu ixtimalınnan çığıp, Älfiä xanım alarnı tınıçlandırırğa tırışqan: “Menä bıyıl sin bara almıysıñ inde, ämma alda yıllar küp äle, siña da milli kul''turağa, tarixıbızğa kübräk iğtibar birergä kiräk bulır, kiläse yıllarda sin dä bu säyäxätkä layıq bulırsıñ, inşalla”, dip tınıçlandırğan. Ä Qazanğa säyäxät isä, Älfiä Alimova fikerençä, milli tärbiäne nığıtu, kiñäytü öçen bik şäp stimul bulıp tora. Moña şulay uq Qazanda bulıp qaytqan iptäşläreneñ üz tä''sirläre belän urtaqlaşuı da zur etärgeç birä. Häm äti-änilärdä dä milli üzañnı nığıtırğa yärdäm itä.

Äñgämädä tağın ber möhim mäs''älä turında süz buldı. Munitsipal''läşterü turında qanun nigezendä Ürän awılı üz statusın yuğalttı häm rayon üzäge Çardaqlı qasabası eçenä kertelde. Ä bu şawqım mäktäpneñ kiläçägenä, dimäk, ana tele uqıtuğa da yanamıymı soñ? Älfiä Alimova fikerençä, ata-analar nıq torsalar, moña yul quyılmas. Häm bu fidaqär zat näq şul yünäleştä eş alıp bara da. Çönki ana tele ul belem genä tügel, ä äxlaq häm tärbiä nigeze dä. Keşe nindi genä kiñ häm tirän belemle bulmasın, imanı say bulsa, annan berkemgä dä fayda yuq. İñ berençese – tärbiä. Ä tärbiä ul barı tik ana söte belän iñgän izge ana tele nigezendä genä mömkin. Çönki här tel xalıqnıñ mental''legenä dä nigez bulıp tora.

Älfiä xanımnıñ süzlären xuplap, ber misal da kiterergä bula. Äytik, bay, qüätle, böyek urıs telendä apanı - señeldän, abıynı - enekäştän, ciñgine – kilennän, ciznine kiäwdän ayıra torğan süzlär yuq. Ä bu isä ölkänlekkä ällä ni iğtibar bulmağanğa işarä bulıp ta tora. Tatardan ayırmalı bularaq.

Ayrat İbrahim, Sember

XS
SM
MD
LG