Accessibility links

шимбә, 3 декабрь 2016, Казан вакыты 01:22

Omski ölkäseneñ Taw awılı 230 yıllığın bilgeläde


Amerika Quşma Ştatları bäysezlek alularınıñ 230 yıllığın bilgelärgä äzerlängän könnärdä Omski ölkäseneñ tönyağında urnaşqan Taw awılı üzeneñ barlıqqa kilüeneñ 230 yıllığın bäyräm itte. Älbättä, biredä yäşäwçe tatar xalqı bäyräm oyıştıruda amerikannar belän yarışmadı. Alay ğına da tügel, Taw awılında yäşäwçelär xätta cir şarınıñ ikençe yağında şundıy uq datanıñ başqalar tarafınnan zur külämdä bilgelänüe turında belmädelär dä.

Taw awılınıñ bäyräm tantanaları yäkşämbe könne uzdı. Bu köngä turı kiterep anda milli bäyrämebez – Sabantuy da ütkärelde. Bäyrämnärneñ töp oyıştıruçıları cirle üzidarä citäkçeläre, uqıtuçılar häm awıl klubı xezmätkärläre buldılar. Rayon xakimiäte tarafınnan da yärdäm kürsätelde. Xakimiätneñ mädäniät bülege häm bülek qarşında eşläwçe tatar mädäniät üzäge ssenariy äzerläwne, kürşe-tirä awıllardan häm şähärdän üzeşçän sänğät kollektivların çaqırıp kiterüne üz östenä aldı. Bäyräm rayonnıñ yıllıq programmasına kertelep, räsmi oyıştırılğan ide. Anda ölkä qanun çığaru cıyılışı deputatları Sergey Jirikov häm İldus Särvärov, rayon başlığı Vladimir Gorev, rayon mädäniät bülege xezmätkärläre häm cirle üzidarä citäkçeläre qatnaştılar. Bäyrämne doğa belän Omskinıñ Xäyer-İxsan mäçete mögällime Zaqir xäzrät Şaripov açtı.

Annan soñ süz rayon başlığı Vladimir Gorevqa birelde. Ul xalıqnı bäyräm belän täbrikläde häm anı oyıştıruda küp köç quyğan mäktäp direktorı Alsu Şaripovağa, töp iğänäçe bulğan Bari Altıynbaevqa räxmät käğäzläre tapşırdı.

Bäyrämdä qatnaşqan deputatlar da bäyräm belän täbriklägän çığışlar yasadılar, üzläreneñ maxsus alıp kilgän büläklären tapşırdılar. Deputat Sergey Jirikov awıl mäçetenä keläm, klubqa muzıkal' üzäk büläk itte. Ä İldus Särvärovnıñ büläkläre sabantuy yarışlarında ciñüçelärgä bilgelängän ide.

Täbrikläwlärdän soñ bäyrämne alıp baruçılar cıyılğan xalıqnı häm qunaqlarnı qısqaça ğına awılnıñ 230 yıllıq tarixı belän tanıştırıp üttelär. Annan soñ xucalarnıñ häm bäyrämgä kilgän kollektivlarnıñ çığışları başlandı. Täbrikläwçe kollektivlar küp buldı. Omskidan “Umırzaya” ansamble häm “Ömet” balalar törkeme, Ust'-İşem rayonınıñ İlçebağa awılınnan, Tevriz rayonınıñ Baybı, Taşatqan, Tuyçı, Kip, Kipo-Qular awıllarınnan üzeşçän sänğät kollektivları kilgän idelär. Bäyräm barğan mäydan alarnıñ törle töstäge milli kiemnärennän çäçäk alanına oşap qalğan ide.

Sabantuy awıl yubiley belän bergä bardı. Bäyräm çaraları ike mäydanda bardı - mäktäp yanındağı mäydanda awıl könenä bağışlanğan çaralar ütte, ä yul arqılı bulğan sport qırında Sabantuy uyınnarı bardı. İke bäyräm bulu säbäple xalıq ta ikegä bülengändäy buldı. Beräwlär yubiley çaralarında bulsalar, ikençelär Sabantuy uyınnarında qatnaştılar. Gömüm alğanda, xalıq bäyrämnän qänäğät qaldı. Küplär mondıy bäyrämnärne yışraq oyıştırırğa kiräk digän fiker belderdelär. Rayon başlığı Vladimir Gorev ta, “Başqa awıllarda da Sabantuylar ütkärergä kiräk, ul xalıqlarnı berläşterergä yärdäm itä.” – dide. Anıñ süzlären deputat İldus Särvärov ta xupladı.

“Umırzaya” ansambleneñ Tevriz rayonına yasağan säyäxätenä ayırım tuqtalu da urınlı bulır. Kollektiv ölkä üzägennän 550 çaqrım yıraqlıqta bulğan Taw awılına rayon mädäniät bülege çaqıruı buyınça bardı. Transport belän “Yenisey” korporatsiäse citäkçese Tamir Alimbaev tä'min itte. Ansambl' tatarlar tuplanıp yäşägän bu yıraq rayonğa barıp çığu forsatınnan faydalanıp, Taw awılı bäyrämendä genä qatnaşıp qalmadı, şul uq rayonnıñ Tuyçı häm Baybı awıllarında da çığışlar yasadı. İke kön eçendä kollektiv utırğıçları yıraq aralarğa yörergä yaraqlaştırılmağan “PAZ” maşinasında meñ çaqrımnan artıq yul ütte. Konsertlar quyıp, arıp-talıp, düşämbe könne tañ atqanda ğına şähärgä äylänep qaytqannan soñ, qayberäwlärgä yal da itmiçä, eşkä çığarğa turı kilde. Şulay bulsa da awırlıqlardan zarlanuçı bulmadı.

Saniä Mirxaleeva, Omski

XS
SM
MD
LG