Accessibility links

якшәмбе, 4 декабрь 2016, Казан вакыты 09:17

Sverdlaw ölkäseneñ Novouralski şähärendä berençe Sabantuyı uzdı


Novoural'ski şähäre Ural qartasında äle küptän tügel, üzgärtep qoru zamanında ğına päyda buldı. Aña qädär bu şähärneñ iseme berniçä sanlı sifrdan ğına ğibärät bulıp, küplär öçen anıñ barlığı da bilgele tügel ide. Bu köngä qädär şähär yabıq rejimlı bulıp qalğanğamı, biredä küpläp yäşägän tatar xalqı milli çaralardan çittä qala.

Cäy başında Tatarstannıñ Uraldağı daimi wäkillegenä häm Yekaterinburg şähärendä eşläp kilüçe Milli media-xolding citäkçelärenä Novoural'ski şähärendä yäşäwçe yäş kenä Wal'mir Galimov digän yeget möräcäğät itte. Wal'mirnı un meñnän artıq tatar xalqı yäşägän tuğan şähärendä milli tormışnıñ yuq däräcäsendä buluı borçıy ikän. Olı yäştäge äbilär, apalar ğına qor'än aşlarında aralaşalar, bolay tatarlarnı berläşterä torğan çaralar uzdırılmıy, dide ul. Bezneñ şähärdä ber tapqır da sabantuy bulğanı yuq, uzdırırğa bulışmassızmı ikän, digän fiker dä belderde. Wal'mirnıñ teläge Milli media-xolding citäkçelärendä yaqlaw taptı. Şulay itep, Novoural'ski şähäre yal parkında berençe sabantuy uzdırıp qaraw başlanğıçı tudı.

Kön yañğırlı bulğanlıqtan, Novoural'ski şähäre sabantuyı park mäydanında urnaşqan “Äkiät sarayı” dip atalğan zur binada uzdı. Çın sabantuydağıça, biredä moñlı tatar cırları yañğıradı, küñelle uyınnar, milli köräş, ger kütärü, qul köräşterü kebek sport yarışları oyıştırıldı, xalıq därtle iyüllär, cırlar belän küñel açtı.

Sabantuyda Tatarstannıñ atqazanğan artistı Xäydär Gıyl'fanov, Qazan däwlät mädäniät häm sänğät universitetı studentları Al'bina Vaxitova, Vilarek Sadıykov, “Urmay moñnarı” festivale laureatı Ruslan Vakkasov häm başqalar tarafınnan bik matur konsert quyıldı. Novoural'skida yäşäwçe tatar xalqı bik qanäğät qaldı.

Sabantuynı qararğa dip kilgän Novoural'ski şähäre sovetı deputatı Aleksey äfände Şixovsov, oyıştıruçılarğa räxmät äytep çığış yasağanda, kiläse yıldan başlap Novoural'ski sabantuyı çığımnarın byudjetqa kertergä wäğdä birde häm mondıy mul bizäkle bäyrämnär şähärdä yıl sayın bulır digän ışanıç belderde.

Fäwiä Safiullina, Yekaterinburg

XS
SM
MD
LG