Accessibility links

сишәмбе, 6 декабрь 2016, Казан вакыты 18:57

“Şüräle” parkında tatarça diskätük uzdı


Soñğı arada tatar yäşläre arasında tatar diskotekaları bik populyarlaşıp kitte. Atna sayın diärlek tatar yäşläre alarğa küñel açırğa cıyıla. 5 iyül könne Yäşlär üzägeneñ “Şüräle” parkında da tatar diskotekası uzarğa tieş ide. Tieş ide dimäktän, diskotekası uzdırıldı, ämma anıñ tatarça buluı ay-hay bik şikle ide.

Östän yañğır yawıp toruına qaramastan da, biergä teläp kilüçelärneñ sanı şaqtıy ide. Timer räşätkä belän uratıp alınğan biü mäydanına teläwçelärneñ barısı da kerä ala. Olısı da keçese dä, yäşe dä, qartı da. Aqçañnı ğına tülä. Kerü bäyäse – 30 sum.

Kiçke säğät sigez tulu belän, biü mäydanın muzıka dıñğırdawı kümde. Ul arada säxnädä kiçäne alıp barırğa tieşle ike yeget tä päyda buldı, kilüçelärneñ käyefen kütärü maqsatınnan dır inde, üzläre dä ürle-qırlı sikerergä totındı. İyüllär belän aralaştırıp törle bäygelär dä uzdırdılar. Alarnıñ ber-ikesen söyläp uzıyq.

Menä säxnägä ike yäş qız mende. Alarnıñ qulına, qabartırğa quşıp, prezervativ tottırdılar. Qızlar ällä oyaldılar, tik birelgän prezervativlarnı alıp baruçılarğa kire birep, töşep kittelär.

Çirattağı bäygegä ike yeget belän dürt qız çaqırıldı. Konkursnıñ maqsatı – ber yegetne ike qız çişenderergä tieş häm buldıra alğança, matur häm seksual' itep. Çişenderdelär. Naskilarına qädär saldırdı qızlar. Ä yalanğaç qalğan yegetlärgä xalıqqa artları belän borılıp, art yaqların selketergä quştılar. Xalıqqa küz saldım. Kemder küzen dä ala almıy, säxnägä qarıy, kemder qulı belän yözen qaplağan, qayberäwläre isä sızğıra-sızğıra qul çaba. Ä yanda ğına 7-8 yäşlär çamasındağı ike bala qarap tora.

Diskotekadan soñ, konsert başlandı. Küpsanlı tanılğan häm yäş cırçılar kilgän ide. Mäsälän, İlsöya Bädretdinova, Al'bina Apanayıva, İdeliä, İlnar Yalalov, Döber-şatır törkeme häm başqalar. Yañğır yawıp toruına da qaramastan, konsert tönge bergä qädär däwam itte.

Bu tatar disko-konsertında bulğan yäşlärneñ kiçä xaqında üz fikerläre bar.

Miña bu diskoteka, ğomumän, oşamadı. Minem uylawımça, bu tatar diskotekasına çın mäğnäsendä xurlıq. Çönki tatar diskotekalarına yörim, bersen dä qaldırmıym, läkin mondıy diskotekalarnı kürgän yuq ide äle. Ayıruça miña alıp baruçılarnıñ diskotekanı niçek itep alıp baruları oşamadı, çönki alar rusça da söylädelär, säxnädä üzlären tärtipsez tottılar. Şulay ük konkurslarğa kilgändä, mondıy diskotekalarda matur ğına konkurslar ütkärälär ide, ä bu diskotekada kilbätsez, kileşsez törle konkurslar ütkärdelär. Anda çişenderülär dä buldı, xätta laıp baruçılar tarafınnan qızlarğa törle yaqtan bäyländelär dä, alarnı çişenderdelär dä. Mondıy diskotekalarnı beterergä kiräk, çönki keşe tatar diskotekasına inde başqaça qarıy başlıy.

“Şüräle”dä ütkän tatarça konsert-diskoteqa şunısı belän üzençälekle buldı: anıñ diskotekası ällä ni üzençälekle dä bulmağandır, çönki anda şul uq rus cırları buldı. Anda ällä ni tatarlıq sizelmi ide alıp baruında da. Läkin menä axırğı konsert öleşendä populyar bulğan, törle yünäleştä, törle stil'dä cırlawçı cırçılar çığış yasadı. Häm anda tağın öy-yaña yäş cırçılarnı da çığardılar. Diskotekasına qarağanda, konsertı ütemle buldı.

Diskoteka äybät kenä, küñelle genä başlanıp kitte. Başta tatar köylärenä biedek, annan soñ ike alıp baruçınıñ säxnägä çıqqaç, käyeflär bik bozıldı. Çönki bezgä monda ädäpsezlek häm äxlaqsızlıq kürergä turı kilde. Keçkenä malaylar-qızlar da b'ar ide. Andıy äyberlär kürsäteläse bulğaç, andıy yäş balalar diskotekağa bötenläy dä kertelergä tieş tügellär ide.

Güzäl Ziatdinova

XS
SM
MD
LG