Accessibility links

сишәмбе, 6 декабрь 2016, Казан вакыты 06:04

Çallıda saqlanu ministrı KamAZ belän qızıqsındı


Rusiä saqlanu ministrı Sergey İvanovnıñ Çallığa bulğan säfäre KamAZ berläşmäse eşçänlege belän bäyle ide. Bigeş hawa alanına kilgännän soñ ministr, Tatarstan prezidentı Mintimer Şäymiev, Çallı xäkime İldar Xalikov, KamAZ generalı Sergey Kogogin ozatuında zavodnıñ baş konveyerına yul aldı. Annan inde fänni - citeşterü üzägenä kilep, KamAZnıñ ör-yaña avtomobil'läre belän tanıştılar. Parij - Daqar uzışlarında 1нче urınnı alğan avtomobil'gä dä utırıp yörde saqlanu ministrı. Şuşında uq ciñü ayulağan Çallı yegetlärenä istälek büläkläre dä tapşırıldı. Şuşı uq fänni üzäktä yuğarı däräcädä kiñäşmä dä ütkärelde. Annan soñ, qısqa ğına waqıtta jurnalistlar belän oçraşu. Sergey İvanov süzlärençä, ul KamAZnı problemalı berläşmä bularaq ta, problemasız bularaq ta kilep qararğa niätlängän. İvanov, KamAZnı grajdanlıq yünäleşendä genä tügel, xärbi yaqtan da üsep baruçı berläşmä dip atadı. Çönki, Rusiä armiäsendäge avtomobil' texnikasınıñ 80%ı KamAZda eşlängän. Häm şuşı texnika alğa taba yañaları, tağın da citezräklärenä alıştırılırğa tieş. Bıyıl, mäsälän, Rusiä saqlanu ministrlığı KamAZğa 2,2 milliard sumlıq zakaz birgän. Sergey İvanov äytüençä, bügenge kön turında söyläşü artıq möhim tügel, 2006-09 yıllarğa xärbi "Mustang", "KamAZ"larınıñ yaña model'lären eşläw, satıp alu turında uylarğa kiräk. İnde, 2015 yılğa qadär qorallanu programmasında Rusiä saqlanu ministrlığı KamAZlar satıp aluğa aqça alunı arttıra baraçaq. Monda, KamAZlar turında ğına süz barmıy, bronyalı texnika da küzdä totıla. Tatarstan prezidentı Mintimer Şäymiev KamAZ borıçların tüläwdä Rusiä xoqümäteneñ role zur buluın bilgeläp ütte.

Töşke aştan soñ ministr Sergey İvanov Samarağa yul aldı. Şunısı da üzençälekle, Çallıda ütkän yuğarı däräcäle söyläşügä tatar matbuğatı jurnalistları çaqırılmadı häm kilgännäre dä kertelmädelär. Monısı, KamAZnıñ mäğlümäti säyäsät departamentı tırışlığı belän buldı. Çallı tatar matbuğatı wäkilläre kertelmäw ber xäl, "Watanım Tatarstan" gazetası, Azatlıq radiosı xäbärçelärenä dä kirtä quydılar.

Ğafiulla Ğaziz, Çallı

XS
SM
MD
LG