Accessibility links

чәршәмбе, 7 декабрь 2016, Казан вакыты 17:24

Bush belän Saakaşvili "ireklekne" ber törle añlıy


Kiläse atnada Peterburda cıyılaçaq Zur 8lek summitına ictimaği oyışmalar häm din ähelläre üzlärençä cıyınğa täqdimnär äzerläsä – il başlıqları möhim söyläşülär aldınnan üz pozisiälären bilgelägän adımnar yasıy. Kiçä Waşingtonda AQŞ häm Gruziä prezidentlarınıñ oçraşuın alar üzläre summitqa bäylämäsä dä, belgeçlär fikerençä, Bush häm Saakaşvilinıñ näq xäzer oçraşuı häm azatlıq öçen köräşkä tuğrı qalaçaqları turındağı belderüe – Peterburda ütäçäk summitqa bäyle.

Oçraşudan ike prezident jurnalistlar aldına çığıp, "törle temalar turında näticäle fiker alışu buldı" dip belderde. Saakaşvili "azatlıqnıñ universal töşençä bulğanın añlıy", dide Bush. AQŞ prezidentı Gruziä xökümäte häm xalqına Ğiraqta kürsätkän yardäme öçen räxmät belderde. Ğiraqta AQŞ citäkçelegendäge koalisiädä 300gä yaqın görci xärbie bar.

Bush, Saakaşvilinıñ iqtisadi säyäsäten häm Gruziäneñ NATO äğzası bulaçağın yaqlayaçağın belderde:

"Gruziäne äğza itep alu NATOğa faydağa bulaçağına ışanam. Gruziägä dä faydağa bulaçaq bu. Äğzalıqnı tormışqa aşıru öçen alda plan bar. NATO äğzaläre belän Gruziä öçen bu eşlärne ciñeläytü yulları turında söyläşerbez. Gruziäneñ äle eşe küp, häm prezident monı yaxşı añlıy."

Xakimiätkä kilüenä inde 3nçe yılı kitkän Saakaşvilinıñ ildä demokratiä üseşe öçen qılğan ğämällärenä Bush ber nindi dä bäyä birmäde, ämma Gruziä prezidentınıñ iqtisadi qazanışların xupladı.

Saakaşvili, üz çiratında, Bushnıñ dönya buylap "ireklek" mäsäläsen alğa sörüenä häm bigräk tä anıñ Ğiraqtağı säyäsätenä xuplaw belderde:

"Ber äyber äytäsem kilä, prezident äfände. Sezneñ "ireklek" mäsäläseneñ çınnan da näticäse bar. Sez anıñ näticäsen Gruziädä kürä alasız, bez anıñ näticäsen Ğiraqta küräbez. Şunnan taypılmağız, zinhar axırına qadär köräşegez. Bez sezneñ belän bulaçaqbız, çönki sezneñ Ğiraqtağı uñışlarığız – Gruziä öçen dä uñış bulıp tora. Bu – ireklekne yaratqan, üzeneñ häm balalarınıñ imin dönyada yäşäwen telägän här keşe öçen zur uñış."

Saakaşvili şulay uq Bushnıñ salım sistemasın oşattı:

"Bezneñ salımnar bik tübän ämma alarnı tüläw arttı. Dimäk salımnar tübän bulsa da, xökümät ni qadär äzräk qatnaşsa – şul qadär yaxşıraq."

Bush alda torğan Zur 8lek cıyını turında ber süz dä äytmäde. Saakaşvili isä bu uñaydan – Gruziä häm AQŞ bik küp mäsälädä ber törle fikerdä tora, dip belderde.

Alsu Qormaş
XS
SM
MD
LG