Accessibility links

шимбә, 10 декабрь 2016, Казан вакыты 00:32

Rusiä prezidentı internetta xalıq belän aralaştı


Çärşämbe xäbär itkänebezçä, bu könnärdä Rusiä prezidentı Vladimir Putinğa soraw birü mömkinlege bar ide. İnternettağı yandex häm bbc säxifälärendä 30 yünnän 6 yülneñ Mäskäw waqıtı belän kiçke säğat 5kä qadär prezidentqa 156 meñnän artıq soraw birelde. Säğat 5tä – prezident belän internet-oçraşu başlandı.

İl başınıñ üz xalqı belän söyläşüe – tarix kitaplarında uqığannarnı xäterlätä. Borın-borın zamanda patşa morzalarına ışanmıyça üz xalqı belän üze söyläşmäkçe bulğan di. Xalıq awır tormışına zarlanğan, il başı – eşlärbez, üzgärterbez, däwam iterbez, üstererbez, üzgärterbez dip utırğan. Döres bu yulı Putinnıñ cawapların äle belä almadıq, ämma belgeçlär näq şulay bulır dip farazlıy. Zarlanular digännän – iñ küp soraw häm alarğa tawış birü – Rusiädä yäşäw däräcäse turında. Häm alarnıñ kübese basılmağan da, çönki yandex.ru säxifäse möxarrire Yelena Kolmanovskaya süzlärenä qarağanda, kübräk soraw tügel, ä zarlanu süzläre kilgän:

"Bez sorawlarnıñ yaqınça 12%tın ütkärmibez. Ütä almağan xatlarnıñ kübese – sügenü yäki xuliganlıq tügel, anda xalıq zarlana ğına, ä soraw yuq."

Xalıqnı aşaw, yäşäw häm balalarnı nindi cämğiättä üsterü borçığanda tormışnıñ başqa yaqları ğadättä çittä qala. Rusiädäge milli säyäsät turında soraw birüçelär küp tügel. Tatarlar Ästerxanda tatar tele qayçan uqıtıla başlar, ni öçen federal televideniädä tatar telendä tapşırular yuq, salımnar tülänä bit, digän sorawlar quyğan. Mäskäwdän üzen Rudakov Vadim dip tanıtqan keşe Başqortstanda tatarlarnı başqortlaştıru säyäsätenä borçılu beldergän.

Demokratik illäredä prezident belän ilbaşı üze telägän çaqta ğına aralaşu ğädäte yuq. Yandex mäğlümat portalı möxarrire Yelena Kolmanovskaya süzlärenä qarağanda, bu eş - prezident administrasiäse niäte bulğan. "Prezidentnıñ matbuğat xezmäte bezgä internet aşa sorawlarnı tuplarğa täqdim itte," dide Yandex wäkile.

Tärräqi itkän däwlätlärdä sorawlar häm borçılular yuğarı xakimiätkä başqa törle yullar belän citkerelä, misal öçen – mäğlümat çaraları. Häm alarnı konkret çaralar kürä alırlıq ministrlıqlar yä idarälärgä citkerälär. Rusiädä prezidentqa soraw birü öçen bu yulı ütä dä zamança ısul – internet çeltäre saylanğan. Putinnıñ sorawlarğa cawabın turı efirda inglizçä söyläwçe "Russia Today" kanalı kürsätte. Sorawlarnı häm cawapalrnı yandex häm bbc säxifälärendä tabıp bula.

Alsu Qormaş
XS
SM
MD
LG