Rusiädä ekstremizmğa qarşı qanun qırıslatıldı

Rusiäneñ Däwlät Duması ikençe uqılışta “Ekstremizmğa qarşı köräş” qanunına üzgäreşlärne qabul itte. Ayırım alğanda däwlät oyışmaları eşçänlegenä qarşılıq kürsätüçelär, tärtipsezleklärdä qatnaşuçılar häm ekstremist eşçänlekkä çaqıruçılar ekstremistlar bulıp sanalaçaq. Dokumentqa kürä, xakimiat wäkillärenä yala yağu şulay uq ekstremizm töşençäsenä kerä.

Bu qanun ölgesen kommunistlar häm “Rodina” firqäse tänqitläp çıqtı. Alarğa räsmilärneñ keşelärne mäxkämä qararı bulmıy torıp cawapqa tartu xoquqı oşamıy. Öçençe uqılışta qanun ölgese şimbä könne qaralaçaq.