Accessibility links

сишәмбе, 6 декабрь 2016, Казан вакыты 08:52

Awıl xucalığı häm azıq-tölek ministrlığınıñ ber citäkçese korrupsiädä ğäyeplänä


Bügen Tatarstanda 1 millionğa yaqın xalıqnıñ yazmışı awıl cirlegenä bäyle bula torıp älege ölkädä barğan waqiğalarğa bitaraf qalıp bulmıy di xalıq ta, jurnalistlar da, xoquq saqçıları da. Bu könnärdä şähär, rayon, awıllarda xucalıq sanın isäpkä alıp yörilär, prezident- ministrlar respublikanıñ rayonnarında awıl xucalığı buyınça seminar - kiñäşmädä qatnaşa. Şul uq waqıtta respublikanıñ eçke eşlär ministrlığınıñ salımnar buyınça cinayätlärne tikşerü idäräse citäkçese Aleksey Selivanov awıl xucalığı citäkçelären aqça talawda ğayıpläp çığa. Tik tomaldan tügel älbättä. Soñğı arada milli proyektlar, ğomum däwlät proyektları populyarlaşıp kitte. Mäğärif, mädäniät, awıl xucalığı ölkäsendä dä yış yañğırıy ul milli proyekt. Menä şul awıl xucalığında ğomum däwlät proyektlarınıñ ütäleşe xaqlı, tieşle, räweştä eşlänelä mikän dip eçke eşlär orğannarı küzätülär, tikşerülär alıp baralar. Tikşerü däwerendä jurnalistlarğa äyterlek qıyıq eşlär kilep çığa. Awıl xucalığı häm azıq-tölek ministrlığınıñ ber idäräseneñ citäkçese, älegä anıñ kem ikänlege äytelmi, respublikanıñ qoşçılıq xucalıqlarınıñ berseneñ başlığı belän kileşep qoşçılıq xucalığınıñ produktlıygın artıru maqsatında qullanırğa dip byudjettan 3 million sum aqça ala häm ul aqçalar bötenläy başqa närsä öçen kitä, yuğala. Mesken qoşlar kemneder bayıtu öçen säbäp kenä bulıp qala. Bu xaqta respublikanıñ eçke eşlär ministrlığınıñ salımnar buyınça cinayätlärne tikşerü idäräse citäkçese Aleksey Selivanov küptän tügel eçke eşlär idäräse oyıştırğan press-konferensiädä dä äytep kitä. Anıñ süzlärenä qarağanda, awıl xucalığı ministrlığınıñ şul matur ğına itep aqça urlawçı qoşçılıq xucalığı belän duslaşa, bolarnıñ şuxır-muxırları zakonlı kürensen öçen törle sıltawlar tabalar, tenderda qatnaştıq dip tä östilär. Şul räweşle däwlättän tağın 60 meñne eläkterep qalalar da üzlärenä eş xaqı sçetına küçerep tä quyalar. Älegä bu eş tikşerü çorın ütä. Rusiä cinayät kodeksındağı “Byudjet aqçaların tieşsez qullanu” , “Aldalaw”, “ Tieşsez räweştä idärä itü” dielgän matdälär buyınça cinayät eşe quzğatıldı di eçke eşlär ministrlığı keşeläre. Qızıq häm qızğanıç xällär. Şuşı könnärdä balıqçılar üz könnären bäyräm itep bolğançıq sulıqlarda wağraq balıqlar totıp yatsalar, xoquq saqçıları ereräk balıqlar totu belän şöğellänä buğay. Röstäm İsxaqi

XS
SM
MD
LG