Accessibility links

җомга, 9 декабрь 2016, Казан вакыты 01:00

Çallıda tatar matbuğatın sanğa suqmıylar


Uzğan atna azağında Çallığa Rusiä saqlanu ministrı Sergey İvanov, Tatarstan citäkçeläre häm başqa räsmi wäkilläre kilgän ide. Saqlanu ministrnıñ säfäre KamAZ belän bäyle bulıp, törle däräcädäge matbuğat çaraları jurnalistları da çaqırıldı. Çallı däräcäsendä "Vesti KamAZ"a, "Çelninskie İzvestiä" häm başqa urıs telendä yazuçı, söyläwçe matbağalarnıñ jurnalistları qatnaştı. Ä menä tatar jurnalistların KamAZnıñ mäğlümäti säyäsät departamentı citäkçeläre çaqırmadılar häm kertmädelär. "Azatlıq" bu xaqta kitte. Şuşı xäbärdän soñ, borçılu belderüçelär dä buldı - ni öçen tatar matbuğatın sanğa suqmıylar, bu - Tatarstan tügel meni, tatar matbuğatın uquçınıñ, tatar radiosın tıñlawçınıñ şuşı matbuğat jurnalistları äzerlägän könüzäk xäbärlärne ana telendä tıñlarğa, uqırğa xoquqları bardır bit, diyüçelär bar. Borçıluçılarnıñ berse, tatar matbuğatı veteranı Nailä Vildanova :

"Çallınıñ tatar matbuğatı 1990 yıllarda zur awırlıq belän buldırıldı. İnde cirle matbuğatqa, xättä respublika küläm tatar gazetaları jurnalistların menä bu oçraqta ministr belän matbuğat konferensiäsenä çaqırılmaw mine nıq aptıraşta qaldırdı."

Älege küreneş uñayınnan soraw tua, monda KamAZ citäkçeläre ğäyepleme, yäki tatar jurnalistlarımı? Nailä xanım fikere :

"Minemçä, ğäyep atta da, tärtädä dä bar. Şulay da KamAZ citäkçeläreneñ ğäyebe zurraq. Çönki, soñğı waqıtta monda tatar matbuğatına mönäsäbät üzgärde, "Nur" gäzite dä yabıldı. İkençe yaqtan, saqlanu ministrı belän oçraşuğa çaqırmaw uñayınnan berdäm räweştä bernindi möräcäğät qabul itmädelär, tatar jurnalistların kimsetü oçrağı bitaraf qaldırıldı.

Nailä Vildanova, Çallıda çığıp kilüçe "Tañ yoldızı" gäziteneñ dä yabılu aldında buluın iskärtte. Äye, mondıy xäbärlär yöri, läkin älegä tögäl cawap alu mömkin bulmadı.

Ğafiulla Ğaziz, Çallı

XS
SM
MD
LG