Accessibility links

шимбә, 10 декабрь 2016, Казан вакыты 23:29

Armiä Qazan yegeten söyakkä qaldırğan


Ber yıl elek armiägä kitkändä Qazan yegete Radik Xäbirov saw-sälämät, kiläçäk turında qayğırtıp yäşi ide. Ämma bu könnärdä Radiknı ätise Qazanğa qoma xälendä alıp qaytqan. 19 yäşlek Radiknıñ awırlığı nibarı 30 kilogrammğa qalğan! Ämma xärbi mediklar da, çast' citäkçelege dä imgätelgän yegetneñ ätisenä berni añlatmıy.

Säyetgäräy Xäbirovnıñ ike ulı da armiä saflarında ber waqıtta bulğan. Olısı Marat aprel' ayında ätisen, tuğannarın şatlandırıp isän-saw öyenä qaytıp kergän. Keçese dä yartı yıl xezmät itkännän soñ, Qazanğa qaytarılğan, ämma qoma xälendä, söyäkkä genä qalğan xäldä.

Radiktan soñğı xatnı ätise uzğan yılnıñ noyäbere axırında alğan, dip yaza “Veçernyaya Qazan” gäzite. Xatta ul ätisenä Saratovta uqularnıñ tämamlanuın, keçe serjant isemen alıp, xäzer xezmät itü urını Totsk şähäre bulaçağın xäbär itkän. Qazan yegete kiläse yılda qaynar noqtalarğa baru planın da äytkän. Ämma ber ay waqıt uzğaç, Säyetgäräy Xäbirov ulınıñ xärbi çast'tän qaçuı xaqında işetkän. 20dän artıq kön yuğalıp torğannan soñ Radik çast'qa äylänep qaytqan, ämma anı psixik awıru diagnozı belän gospital'gä salğannar, dip äytkännär Säyetgäräy Xäbirovqa. Ämma aña bu xaqta xäbär itkändä inde fevral' axırı bulğan. Üz ulına Säyetgäräy küz yäşlärsez qarıy almağan. Mondıy küreneşne barı tik faşistik törmälären kürsätkän fil'mnarda ğına kürergä buladır. Awırlığı 30 kiloğa qalğan tere skelet yata ide anıñ aldında. Radiknıñ xätta tın alırğa da köçe qalmağan.

Ni öçen Radiknıñ xäle turında irtäräk xäbär itmägännär, 20dän artıq köngä yuğalğan yegetne ezläp tä qaramağannar dip zarlana yegetneñ ätise. Ulınıñ armiädän qaçuın ul andağı mısqıl itülär belän añlata. Psixik awırular kinät kenä barlıqqa kilmi. Äle Saratovta uqular waqıtında da Radik saw-sälämät bulğan. Monı xärbi mediklar da inqar itmi. Ämma Säyetgäräyneñ xaqiqät'ne ezlärgä waqıtı yuq. Ul kön-tön ulı yanında. Ätise ulın 3 säğät sayın aşata, xätta tönlä dä. Aña bu eştä üz änise yärdäm itä. Xatını belän isä alar küptän ayırılışqan bulğan. Öydä şifaxanä şartların oyıştıra almasalar da, quldan kilgän qädär alar yegetne qotqarırğa tırışa. Ä köndezlären ulın äbigä qaldırıp, Säyetgäräy törle oyışmalarda yöri. Xärbi komissariattan yegetkä tülänergä tieşle 7мең sum kompensatsiäne dä, invalidlıq buyınça pensiäne dä ul haman ala almıyça yöri. Çönki xärbi çast'tä Radiknıñ pasportın yuğaltqannar. Yañanı yasaw öçen isä ber ay waqıt kiräk. Alarğa bu eştä yärdäm itärgä tırışuçılar da, Radiknı qıynalğan yegetlärne tabıp, cazalarğa cıyınuçılar da yuq älegä.

Al'bina Zäynulla

XS
SM
MD
LG