Accessibility links

шимбә, 10 декабрь 2016, Казан вакыты 06:07

Qaytqan watandaşlarğa yärdäm itärgä cıyınalar


Şulay itep türälär küçep qaytırğa riza buluçılarnıñ yul çığımnarın qaplarğa, ternäklänep kitü öçen matdi bulışırğa, eş, toraq mäs’äläsendä dä yärdäm itärgä wäğdä itä. Sişämbe könne ministrlar kabinetında uzğan brifingta süz şuşı xaqta da bardı. Älege programma qısalarında Tatarstanğa da qaytuçılar bulırmı? Rusiä Federal' migratsiä xezmäteneñ Tatarstandağı idäräse citäkçese Yevgeniy Däwlätşin qaytuçılar bulır dip sanıy. “Elegräk alarnıñ kübese yortsız, mölkätsez, eşsez qaludan qurıqtı. Xäzer isä däwlät yärdäm itärgä süz birä, dide idärä citäkçese.

Problemaları çınlap ta şaqtıy bulsa da, moñarçı da respublikağa qaytuçılar häm kilüçelär az bulmadı. Bu yılnıñ berençe altı ayına alınğan mäğlümatlar buyınça ğına da, Tatarstanda 46 meñgä yaqın çit il keşese terkälgän. Alarnıñ kübese Üzbäkstan häm Törkiädän kilgän. Xäyer, alarnıñ kübese monda toru öçen tügel, ä eşkä, uqırğa häm başqa säbäplärdän kilde. Brifingta äytelgänçä, çit illärdän kilüçelärneñ 5 meñe eşläw öçen röxsät alğan. Alarnıñ kübese tözeleştä, qalğannarı satu, sänäğät oyışmalarında xezmät kürsätä.

Älbättä, alar arasında tuğan cirlärenä qaytuçılar, yäşärgä kilüçelär dä az tügel. Qaytqan watandaşlarğa yärdäm xaqında qaytuçılar üzläre ni uylıy ikän? Menä Qazanğa Ukrainadan qaytqan watandaşıbıznı tıñlap qarıyq:

Bezgä yärdäm kiräk tügel. Bez üzebezgä üzebez yärdäm itä alabız. Tuğan cirebezgä qaytabız bit. Tik menä watandaşlıq alğanda bezgä bik küp problemalar yasıylar. Dokumentlarnı oformlyat' itkändä bik nıq talıylar! Niqädär küp aqçalar tügäbez şunda. Bu bit iskitmäle küreneş. Alay yaramıy!

Watandaşlarğa yärdäm itü buyınça Putin çığarğan ukaz äle sentäberdä genä köçenä keräçäk. Bügen isä tuğan illärenä qaytuçılarnıñ kübese haman da üzenä urın taba almıyça yöri.

Al'bina Zäynulla

XS
SM
MD
LG