Accessibility links

пәнҗешәмбе, 8 декабрь 2016, Казан вакыты 17:10

“Tatneft''”neñ yaña bilgesen Şäymiev qabul itmägän


Tatarstan prezidentı respublikanıñ neft'çeläreneñ ayırım alğanda “Tatneft'”neñ eşläre, uñışları belän härdaim tanışıp bara. Bu oçraqta umartaçı babay küz aldına kilä, anıñ üz umartalıqların küz qarası kebek qarap, tikşerep, kübräk bal birgän oyalarğa şirbätne kübräk birüe…Alabuğada uzğan sammitta da Tatarstan prezidentı “Tatneft'”kä şirbätne, maqtaw süzlären jällämi. Aları da prezident äytkän eşlärne ber süzsez başqarırğa tırışalar. Uzğan yılğı samitta alarğa bitum yatmaları üzläşterä başlarğa quşılğan bulsa, bıyılnıñ may ayında, azdırmı ul küpterme, ör-yaña texnologiä buyınça 4 tonnağa yaqın bitum suırta da başlağannar. Ul yaña texnologiä öçen 37 million sum aqça totqannar. Tatarstan neft'çeläreneñ yıllıq çimal tabışı 30 million tonnadan artıp kitä ikän. Ul tabışnıñ altıdan ber öleşen biş-altı yıl elek oyışqan bäysez neft' kompaniäläre tulılandıra. İñ zur tabış Tatarstandağı neft' eşkärtü sänäğäte akulası “Tatneft'”tä. Belgeçlär äytüençä, älege qara altın suıruçı şirkät yılına yaqınça 12 milliard sum tabış kiterä. Ul tabışnıñ 80 protsenttan artığı Mäskäwgä kitä, tege üz-üzlären aşata almağan Rusiäneñ başqa töbäkläreneñ tamağın tuydırırğa. Älbättä, neft'çelär sammitında bu xaqta äytelmi, anda barsı da yuğarı ruxta, “Bez buldırabız!” ruxında bara. Bu xaqta “Tatneft'” berläşmäseneñ matbuğat üzäge citäkçese Röstäm Rafiqovta bezgä menä närsä dide: - Mintimer Şäymiev neft'çelärgä bik küp räxmätlär äytte. “Döres yul belän barasız!”- di. “Buldırabız häm buldırasız!” – dip tä östäde. Bu “Tatneft'” matbuğat xezmäte citäkçese süzläre buldı. Tege bitumnı üzläşterü turında sammitta qat-qat äylänep qaytıp söyläşälär. Çönki belgeçlär Rusiädä bitum zapası 20 milliard tonna, ä Tatarstanda 7 milliard çaması dip isäplilär. Monda inde salım taşlamaların da Däwlät Dumasınnan bezneñ xökümätkä yullarğa turı kiläçäk. Söyläşü şuşı noqtağa citkäç Mintimer Şäymiev Tatarstan xökümäte başlığı Röstäm Miñlexanovqa borılıp:“ Tatarstan qaramağındağı cir, mölkät häm başqa salımnarnı xäl itüne üzebezneñ öskä alırğa wäğdä biräbez” – dip tä äytep quya. Bu xaqta “Watanım Tatarstan” gazetası xäbärçese yaza. Ul xäbärçe prezidentqa törtterep süz dä äytä äle. Bu xäl bolayraq bula, neft'çelär sammitı “Tatneft'” kürgäzmäsennän başlana. Anda yaña firma bilgese, brendı turında bäxäs quba. Tatarstan flagı töslären qullanıp suzınqı tamçı räweşendä yasalğan simvol bula ul. Ul tamçını Mintimer Şäymiev awır qabul itä. Bu minutlarnı iskä töşerep “Tatneft'” matbuğat üzäge citäkçese Röstäm Rafiqov süzen bolay dip däwam itte: - Bez kürgäzmägä quyğan yaña bilgene prezident oşatmadı, elekkese kübräk otışlıraq häm küñelgä yatışlıraq ide di. Yaña äyberne qabul itü awır inde anı, waqıt ütü belän künegelä ul … Wät şunnan Röstäm Miñlexanovnıñ : “Bu bit korporativ bilge genä” – dip aqlanuına häm “Watanım Tatarstan” gazetası xäbärçeseneñ: “Fontannar çorı uzdı bit inde” – dip törtterüenä, fontan digännän elekke bilge fontan formasında ide, Tatarstan prezidentı bolar belän kileşmiçä:“Fontannar bar ele bezdä, häm bulaçaq …” dip qırt kisterep quya. Annan inde kiñäşmä prezidentnıñ süzen raslaw yunäleşendä däwam itä… Röstäm İsxaqi

XS
SM
MD
LG