Accessibility links

дүшәмбе, 5 декабрь 2016, Казан вакыты 13:37

Novosibirski sabantuyı Çanı rayonında uzdı


Rusiäneñ küp kenä töbäklärendä kebek, Novosibirski ölkäseneñ qayber rayonnarında häm awıllarında xalqıbıznıñ milli bäyräme – Sabantuylar bulıp uzdı. Şähär, rayon häm awıl Sabantuyları Qolıvan rayon üzägendä, şul uq rayonnıñ Yurt-Aqbalıq awılında, Novosibirskinıñ üzendä iyün ayında uq ütkärelde. Ölkä tatar milli mädäni möxtariäte räise Mödäris Abakirov süzlärençä, Sabantuylarnı yıl sayın yaña urınnarda , tatarlar az bulğan urınnarda da ütkärergä kiräk. Çönki xökümät wäkilläre bäyräm oyıştıruda qatnaşıp kitsälär, soñınnan bäyräm oyıştırğanda, qızıqsınıp, üzläre ük yärdämgä kilälär.

Şulay, Novosibirski yağında milli bäyrämnärne töbäkneñ törle rayonnarında ütkärü prinsibına tayanıp, ölkä Sabantuyın bıyıl Çanı rayonında oyıştırdılar.

Novosibirski tatar mädäniät üzäge direktorı Rauza Tixomirovasüzlärençä, ölkä Sabantuyı anda berençe märtäbä ütkärelgän. Ul “Kileşüdä berdämlek tua” dip isemlängän millätara bäyrämnär proyektına kertelgän. “ Bäyräm ütkärergä ölkä xakimiäte 200 meñ sum aqça birde”, - di Mödäris Abakirov.

Ölkä Sabantuyı Çanıda 8 yül könne uzdı. Bäyrämgä kollektivlar ölkäneñ törle rayonnarınnan häm Tatarstannan kilgän idelär. Aldan äytkänebezçä, ölkä sabantuyı milli bäyrämnär programmasına kertelgän ide. Şul säbäple Çanıda Sabantuy belän berrättän başqa mädäni çaralar da oyıştırıldı. Bäyräm 7 yül könne Tarmakul' awılında törle milli kollektivlarnıñ zur konsertı belän başlanıp kitte. Annan soñ tantana Şçeglova awılı yanındağı kül' buyına küçte. Anda slavyan xalıqlarınıñ “İvan Qupalo” bäyräme başlandı. Biredä dä törle kollektivlarnıñ çığışları buldı. Konsertnı qızıqlı itep “Su qızı” häm “Şüräle” alıp bardı. Tamaşağa “Su patşası - Neptun” da quşıldı. Ğomumän, xalıq tamaşa qıldı, uyınnarda qatnaştı, küñel açtı. Cır-iyüllär, şayarular tön urtasına qädär bardı. Şunsı ğına keşelärneñ berniqädär käyefen bozdı, hawa salqın bulu säbäple, programmada qaralğan tönge kümäk su qoyınular bulmadı.

İkençe könne Çanınıñ üzäk mäydanında Sabantuy başlandı. Törle milli kollektivlar, Sabantuy qolğaları kütärep, tantanalı räweştä mäydanğa kerdelär. Annan soñ süz xakimiät wäkillärenä, qayber deputatlarğa häm rayon başlığına birelde. Sabantuy uyınnarı konsert nomerları belän ürelep bardı. Xalıq Tatarstan artistların da, cirle talantlarnı da cılı qarşıladı.

Şulay itep, Novosibirskinıñ ölkä Sabantuyı berençe märtäbä şähärdä tügel, ä ölkäneñ ber rayonında ütte. Gömümän äytkändä, oyıştıruçılar da, qunaqlar da bäyrämnän qänäğät qaldılar. Bıyılğı bäyrämnärgä äle yomğaq yasalıp betmägän, tatar oyışmaları citäkçeläre inde aldağı yıldağı sabantuylarnı qayğırta başladılar. Ölkä milli mädäni möxtäriäte räise Mödäris Abakirov ikençe yılnı ölkä sabantuyın Qıştaw rayonında ütkärergä kiräk, di. “Bu rayonıña 3 tatar awılı bar, awıllarda mäçetlär dä eşli. Dinle xalıq tärtiple bula, bäyräm oyıştırırğa osta bula”, di.

Saniä Mirxaleeva, Omski

XS
SM
MD
LG