Küp illärneñ başlıqları häm xalıqara oyışmalar İzrailneñ Libandağı xärbi operasiasen kisken ğäyepläde. Berläşkän Millätlär Oyışması, Yewropa Komissiase, Rusiä, İtalia häm Gretsiä İzraildän Libanğa höcümnärnne tuqtatırğa çaqırdı.
İzrail qorallı köçläre idaräse başlığı Dan Xalus isä, Libandağı hädäflärgä yañadan xöcüm itelergä mömkin, dip belderde. General süzlärençä, xöcümnär tuqtalsın öçen “Hizbulla” törkeme awızlıqlanırğa tieş. Alar İzrailneñ ike xärbien urlağan häm İzraildäge toraq urınnarnı raketa utına totqan. “Hizbulla” citäkçelege isä, üz çiratında, Liban başqalası Bäyrütkä yaña höcümnär oyıştırılsa, cawap itep İzrailneñ Xayfa şähäre raketa utına totılaçaq dip yanadı. Xayfa Liban çigennän 30 çaqırım yıraqlıqqa urnaşqan. Liban xakimiate xäbär itkänçä, pänceşämbegä qarşı töndä İzrailneñ hawadan Bäyrütne bombağa totuı näticäsendä 30-dan artıq tınıç keşe üterelgän. Ä «Hizbulla» atqan raketalardan 8 izraille yaralanğan. Ğaza sızığında şulay uq İzrail operasiase däwam itä.
