Accessibility links

җомга, 9 декабрь 2016, Казан вакыты 05:00

Pervouralski mäçetendä kürkäm nikax mäclese bulıp uzdı


Soñğı yıllarda ike yäşneñ quşıluın nikax belän berketü, yaña tuğan sabıylarğa möselman yolası buyınça isem quştıru kürkäm ğädätkä äwerelep bara. Xätta xämersez tuylar belän dä inde berkemne dä şaqqatırıp bulmıy. Şulay da bu comğada Pervoural'ski şähäre mäçetendä uzdırılğan nikax mäclesenä ayırım tuqtalıp ütäse kilä. Bu waqiğa yäşlekneñ, saflıqnıñ, täwfiqlılıqnıñ matur ürnäge bulıp tordı.

Nikax mäclesenä kiäw belän käläşneñ yaqınnarı, tuğannarı, dusları ğına tügel, yaqın-tirä şähär häm awıllarnıñ mäçetläre imamnarı da kilgän ide. Kiäw bulası keşe, yäş kenä üzbäk yegete Äqmälcan monnan ber ay elek Pervoural'ski mäçeteneñ yäş imamı bulıp eşli başladı. Ul ber yıl buyı Sısert rayonı, Oktäberskiy bistäse imamı bulıp eşläp, üzeneñ uqımışlılığı, kürkäm xolqı belän rayon möselmannarı arasında ğına tügel, ölkä buyınça da zur abruy ayulap alğan. Qazıyat idäräseneñ üzäge bulıp sanalğan Pervoural'ski mäçetendä Äqmälcan xäzrätne bik yaratıp qabul ittelär.

Äqmälcan xäzrät üze söyläwençä, anıñ biregä küçep kilüe Qazıyat idäräse citäkçeläre çaqıruı arqasında ğına tügel. Monnan ber yıl elek, imamnar öçen uzdırılğan seminarğa dip kilgäç, yäş yegetneñ küze biredäge çibär, tıynaq, aqıllı tatar qızı Rozaliägä töşep qalğan. Rozaliä, üsmer çaqlarınnan birle mäçetkä yörüçe, unöç yäşennän namazğa basqan insaflı qız. Qıznıñ äti-änise belän dä tanışqaç, waqıt uzıp, xisläreneñ ütmäslek nıq buluına ışanğaç, yeget bulaçaq käläşkä süz quşıp, täwäkkälläp qarıy. Häm menä şundıy insaflı, çın möselman ğailäse tua.

Nikax mäclesen böten şartın kiterep möğallim Mansur xäzrät alıp bardı. Yäşlärneñ dä, äti-änilärneñ dä, şähitlärneñ dä rizalığın alıp, nikax uqılğaç, yäş ğailägä şähadätnamä tapşırıldı. Annan soñ cıyıluçılar färeştädäy çibär käläşne häm yäş kiäwne täbrikläp, tigez, tınıç, iman nurı belän balqıp torğan matur tormış telädelär.

Fäwiä Safiullina, Yekaterinburg

XS
SM
MD
LG