Rusiädä kommunal' - toraq xezmätlärendäge çataqlıqlar belän inde berkemne dä ğäcäpländerep bulmıy. Fatirlarda cılı betü, yäki may ayınıñ 20 graduslı esse könnärendä kiresençä, cılı birü diseñme, barısın da kürergä bula. Su belän bulğan xällärne äytep torası da yuq, salqını bulsa qaynarı yuq, qaynarı bulsa salqını yäki, ikese dä yuq. Çallınıñ 38 bistäsendäge 49 yortta yäşäwçelär moñarçı kürelmägän waqiğa tarıdılar. Salqın su kilergä tieşle torba - krannardan qaynar su ağa başlağan. Ä menä qaynar su torbalarınnan salqını kilä başlağandır dip uylawçılar yalğışalar, anısınnan tieşlese, yäğni qaynarı kilä. Şulay itep, fatirlardağı aş bülmälärendäge, yuınu urınnarındağı häm bädräflärdäge krannarnıñ härbersennän qaynar su ğına kilep tora. Bu küreneş 13 iyüldä başlanğan häm 14 iyül könne dä, şuşı xäbärne birgän waqıtqa däwam itä ide. Fatir xucalarınıñ berse, Miñnexan Säg'diev äytüençä, ul inde 3-4 tapqır kommunal xezmätkärlärgä şaltıratqan. Santexniklar kilep, krannarnı borıp, torbalarnı totıp qarıylar da ikän, ğäcäplänep kitep baralar. İnde ikençe kön şulay. "Azatlıq" xäbärçese "Mäxällä"neñ baş dispetçerı belän elemtägä kerde häm bu küreneşneñ säbäpläre belän qızıqsındı. Dispetçer abzıy da säbäplärne belmi bulıp çıqtı, tikşererbez, belerbez dide, menä anıñ süzläre.Santexnik kilergä, qararğa tieş, qaramıyça belep bulmıy. Äytkänemçä, santexniklar menä ikençe kön inde kilälär. Qarıylar kitälär, näticäse genä yuq. Uramda 30 gradustan artıq esselek, qaynar torbalar monı tağın da esselätä. Şul yağı da bar, qaynar su aş peşerergä, çäy quyarğa yaraqlı tügel.
Ğafiulla Ğaziz, Çallı
