Accessibility links

җомга, 9 декабрь 2016, Казан вакыты 14:37

İzrail Liban belän Süriä çik buyın utqa tottı


İzrail xärbi oçqıçları inde 4nçe kön Libanğa höcümnären däwam itä. Bügen Libannıñ Süriä belän çik buyında urnaşqan Masnaadağı çikne kiçü noqtası utqa totıldı. Liban polisiäse xäbär itüençä, ilneñ könyağında bügen kimendä 15 sivil keşe häläk bulğan. Hizballa üz raketaların İzrailneñ Tiberias şähärenä attı. Comğa könne İzrailneñ ber xärbi köymäsenä Hizballa raketası elägüe bügen raslandı. Xärbilär wäkile İdo Nehustan, İranda eşlängän raketanıñ İzrail köymäsenä atıluı – Tährannıñ Hizballanı yaqlawına dälil, dip belderde: "Xärbi köymägä raketa atılğanın raslıybız, köymädä bulğan 6 diñgezçe äle dä tabılmadı, köymägä ziyan kilde. Raketa – İranda eşlängän raketa ide. İrannıñ Hizballağa yardäm itüenä dälillär bar." Qahirädä bügen ğäräp illäreneñ tışqı eşlär ministrları cıyıldı. Ğäräp Ligası yabıq işeklär artında İzrail xärbi köçläreneñ Libannı utqa totuın kisken ğäyeplägän belderü qabul itte. Liban tışqı eşlär ministrı Fäwzi Salux, ğaräp däwlätläreneñ, İzrailneñ Libanğa höcümenä qarşı reaksiäse kiräk qadär qatı tügel, digän. Rusiä saqlanu ministrı Sergei İvanov, nizaqqa Yaqın Könçığıştağı başqa illärneñ dä quşılu qurqınıçı bar, dip , tsitata "suğış başlanğan inde" dip belderde. İvanov Hizballanı terrornı tuqtatırğa, ike yaqnı da köç qullanunı çiklärgä çaqırdı. Bazarda neft bäyäse comğa könne soñğı waqıtlardağı üzeneñ iñ yuğarı noqtasına, ber miçkäse 78 dollarğa citte. İzrail häm Livan üzlärendä neft çığarmasalar da, tirä yaqtağı däwlätlärdän dönyadağı neftneñ 3tän 1 öleşe çığa.

XS
SM
MD
LG