Accessibility links

җомга, 9 декабрь 2016, Казан вакыты 10:47

Yaqın Könçığışta tiz genä tınıçlıq bulmayaçaq


Izrail inde 5nçe kön Libannı utqa tota. Hizballa İzrailneñ öçençe zur şähäre bulğan Haifağa raketalar attı. Alarnıñ 5se poez stansiäsenä töşte. Häläk buluçılar bar, yaralanuçılar küp.

İzrail premyer-ministrı Ehüd Olmert, bu höcümneñ näticäse citdi bulaçaq, dip belderde. Bügen İzrail xärbi oçqıçları Liban başqalası Beirutnı, Hizballanıñ televidenie kanalın häm yağulıq stansiäsen bombaladı.

Piterburda zur 8lek sammitında qatnaşqan AQŞ prezidentı George Bush, tağın ber tapqır, İzrailneñ üz üzen yaqlarğa xoquqı bar, dip qabatladı. Häm böten bu çıqqan nizaqta Hizballa häm alarnı yaqlağan Süriä häm İran ğayeple, dip belderde:

"Qabınıp kitkän nizaqta şul qızıq – Yaqın Könçığıştağı totrıqsızlıqnıñ säbäbe kürenep tora. Ä säbäbe – Hizballanıñ Süriä belän elemtädä toruı, Hizballanıñ İran belän xezmättäşlege, Süriä belän İran arasındağı mönäsäbätlär. Problemanı xäl itü öçen – anıñ asılın añlaw möhim."

Şulay uq bügen Piterburda bulğan Britaniä premyerı Tony Blair, nizaqnı, töbäktäge problemalarnıñ çişelüen telämägän keşelär başladı, dip belderde:

"İke bäysez däwlät – İzrail häm fälestin däwlätenä ireşergä telämägän ekstremistlar tınıçlıq prosessına qomaçawlıy. Şulay uq İran häm Süriä tarafınnan yaqlanğan, Libanda wazğiätne qatlawlandırırğa telägän, kierenkelek häm doşmanlıq buluın telägän suğışçılar bar."

Liban premyer-ministrı Foad Siniora, köç qullanunı tuqtatırğa çaqırıp, İzrailne, töbäkne faciğale urınğa äyländerüdä ğäyepläp çıqtı. Ul arada BMOnıñ İminlek Şurası taraflarnı tınıçlıqqa çaqırğan belderü qabul itä almadı. Ämma Rusiä tışqı eşlär ministrı Sergei Lavrov süzlärençä, İminlek Şurası rezolüsiäse barıber kiräk bulaçaq:

"Libandağı wazğiät – faciğağa yaqın. Çişeleş – İminlek Şurasınıñ Liban häm İzraildä iminlek turında rezolüsiä häm ğömümän Yaqın Könçığıştağı soñğı xällär turında berär törle qarar qabul itelüe bula ala. Zur 8lek citäkçeläre sammitta Liban häm İzrail-Fälestin nizağı turında üz süzlären äytäçäk."

Liban tışqı eşlär ministrı Fäwzi Sallux, kiçä Ğäräp Ligası cıyınında ğäräp däwlätlärenä Libannı yaqlawı öçen räxmät belderde. Liban İzraildän ziyannı qaplawnı taläp itäçäk, dide:

"Libannı İminlek Şurasına möräcäğät yulı belän yaqlaw turında qarar qabul itelde. Häm bez Libanğa kilgän böten ziyan öçen İzraildän kompensasiä taläp itäçäkbez. Ğäräp xezmättäşlege öçen räxmätlebez."

İzrailneñ xärbi hawa höcümnäre Libanda 106 keşeneñ ğömeren özde, alarnıñ kübese – tınıç xalıq. Beirut hawa alanına zur ziyan kilde.

Alsu Qormaş
XS
SM
MD
LG