Yaqın Könçığışta arta barğan kierenkelek – bügen Rusiädä açılğan zur 8lek sammitınıñ köntärtibendä berençe mäsälä bulıp tora. İqtisadları tärräqi itkän dönyanıñ iñ qüätle 8 ile citäkçeläre köç qullanunı tuqtatu şartları turında berlektä belderü qabul iter dip kötelä. Ul arada Peterburda globalizasiägä qarşı uram cıyınnarı uzdı. Uramdağı keşelärneñ berse, Petr Rauş, böten suğışlar öçen zur 8lek illäre cawap totırğa tieş, dip belderde:
"Zur 8lek tiräsendäge iñ zur problema – ul suğışlar. Suğışlarda yözlägän meñ keşe häläk buldı, bu xattä atom yağulığı plannarınnan da möhimräk. Kavkaz, Äfğanstan, Ğiraq turında äytüem. Şul 8lek illärendä añlasınnar ide, moña qarşı alar köräşergä tieş, ä prezidentlar häm xökümätlär tügel."
Rusiä tışqı eşlär ministrı Sergei Lavrov bügen Görcistannıñ suğış yaqlı köçlären provokasiädä ğäyepläde. Şimbä könne Könyaq Ossetiä yanında berniçä Rusiä keşese, alar arasında ber diplomat häm ber xärbi berniçä säğätkä totqarlanğan. Lavrov süzlärençä, Görcistan Ossetiä belän çik buyında xärbi çarağa äzerlänä.
