Alar Görci-Osetin nizağın cayğa salu buyınça qatnaş küzätü törkeme utırışında qatnaşudan baş tarttı. Utırış düşämbe Tiflistä bulırğa tieş ide. Komissiäneñ Könyaq Osetiädän räistaşı Boris Çoçiev, iminlek turında qayğırtıp şundıy qararğa kilende, dide. “Gruziä, täcribä kürsätkänçä, kemneñ dä bulsa iminlege turında uylıy torğan il tügel ul”, dip östäde Çoçiev. Soñğı waqıtta nizağlı töbäktä xälneñ kiskenläşüendä häm küptän tügel genä berniçä keşeneñ ülüendä dä Könyaq Osetiä xakimiate Gruziäne ğäyepli. Tiflis böten ğäyepläwlärne dä kire qağa.
