Mäktäp yäşendäge balalar cäyge yalların mömkinleklärenä kürä törleçä ütkärä. Beräwläre äti-änise belän diñgez buyında yal itsä, ikençeläre äbi-babasında bula, qaysıları yäşelçä, bäräñge baqçalarında ölkännärgä yärdämgä kilälär. Balalarnıñ cäyge yalları turında xäzer din ähelläre dä qayğırta başladı. Omskida berniçä yıl rättän möselman balaları öçen cäyge yal-uqular oyıştırılıp kilä. Cämiğ mäçete qarşında bıyıl 40 könlek lager' eşläde.Şuşı könnärdä genä balalar öylärenä taraldılar. “Balalar mäçettä tordılar, aşadılar, eçtelär, attraksionnarğa yördelär, futbol uynadılar,”- dip söyli Seber yağı möftie Zölqarnäy xäzrät Şakircanov. “Balalar ğäräp imlyasen, din nigezlären öyrändelär. Barısı da Qor'än uqırlıq bulıp qaytıp kittelär,”- di möfti-xäzrät. Ber uñaydan şunsın da äytep ütärgä kiräk, Omskinıñ Cämiğ mäçetendä dini uqular yıl äylänäsendä dä bara. Däreslärgä ğädättä balalar ğına tügel, ölkännär dä yörilär. Möfti-xäzrät Şakircanov süzlärençä, anda uquçılar yaxşı äzerlek alalar häm qayberläre dini belemnären çit illärdä dä däwam itterälär.
Şulay itep, şähärdä mäçetlär xalıqqa din beleme, dini tärbiä birüdä eş alıp baralar, qızğanıçqa qarşı, awıllarda başqaçaraq küreneş. Omski ölkäsendä Seber yağı möftiätenä qarağan 27 mäçet eşli. Alarnıñ küpçelege comğa könnärendä, qayberläre bäyrämnärdä genä açıla.
Mäsälän Ust'-İşem rayonı İlçebağa awılında monnan ike yıl elek açılğan mäçet şundıy uq xäl diärgä bula. Döres, biredä eş bötenläy barmıy dip äytep bulmıy. Mäçetneñ imamı 75 yäşlek Garäfetdin babay Gıymaev süzlärençä, comğa namazlarına xalıq yöri, bäyrämnärdä mäçet tulı bula. 15 yäşlek 2 yegetne uqırğa cibärgännär, alarnıñ berse Omskida Cämiğ mäçetendä, ikençese Törkiädä uqı. Balalarnı cälep itälär, mäktäp direktorı belän söyläşengän , ul qarşı tügel, balalar comğa könnärendä kilgälilär. Xätemnär ütkärälär, öyläneşüçelärgä nikaxlar uqıylar. “Ozaq yıllar dinnän bizderelgän, xalıq töşenep citä almıy äle. İnşalla alay bulsın inde: aldağı köndä ber-berebezne beleşep, oçraşıp, dinne kütärergä yärdäm itärgä kiräk,”- di İlçebağa mäçete imamı.
Rozaliä Sayganova, Omski
