Accessibility links

шимбә, 3 декабрь 2016, Казан вакыты 20:54

Omsk ölkäsendä fermerlar niçek yäşi?


Ğömer baqıy awıl keşese, aqçalı eş, yaxşı tormış ezläp, zur şähärlärgä barıp urnaşırğa omtılğan. Küçep kitüçelär küp oçraqta şähärlärdä töplänep tä qalğannar. Ämma siräk bulsa da, şähärdän awıllarına kire qaytuçılar da bula. Andıylar Omski ölkäsendä dä oçrıy. Küptän tügel miña şundıy, kire awılına qaytqan ber ğailä belän tanışırğa turı kilde. Bu Bol'şereç'ye rayonınıñ Yälankül awılınnan Omskiğa küçep, 5 yıl yäşägännän soñ, torğan yaqlarına äylänep qaytqan Ğaliä häm Ğali Karimovlar. Alay ğına da tügel, alar elek yäşägän awıllarına qaytmağannar, ä annan 7 çaqrım yıraqlıqta urman eçendä kül buyında urnaşqan bulğan, ämma xäzerge köndä tulısınça tarqalıp, yuqqa çıqqan Qumıslı awılı cirenä qaytqannar. Anda yort salıp, fermerlıq eşe başlap cibärgännär. Ğali äfände aşlıq çäçä, terlek ürçetä. Sıyırlar asrıy. Ämma rayon üzäge yıraq bulu, üzlärendä söt eşkärtelmäw säbäple, alarnı sawmıy. Bozawlar äniläre belän bergä, imep üsälär häm 1 yıl eçendä itkä satıp cibärerlek bulalar, - di Ğali äfände.

Ğaliä xanım da kön buyına xucalıqta şöğellänä. Annan tış ul äle mäktäptä dä eşli, Yälanküldä balalar uqıta. Pensiä yäşendä bulsa da, yalğa kitärgä aşıqmıy.

Urmanda yäşägäç, xucalarğa ayu-büre kebek yırtqıç canwarlarnı da oçratırğa turı kilä. “Ämma bez alarnı da, qoş-qortlarnı da atmıybız, - di Ğaliä xanım. Xayvannar da bezdän qurıqmıylar. Yärdäm kötep, öy yanına kilgännäre dä bula. Mäsälän, ike yıl rättän köz köne soñğa qalıp tuğan aqqoş bäbkäläre kilde. Bez alarnı totıp, öygä alıp kerdek, aşatıp-eçertep, Bol'şereç'yedağı zooparkqa iltep birdek”,- di Ğaliä xanım.

Fermerlıq eşe belän şöğellänüdän tış, Ğali äfände awıl klubında mödir bulıp ta eşli. Cimerelep barğan klubnı ul Omskida yäşägän ber tuğanı belän tergezgän.

Menä şundıy tırış, eş söyüçe Ğaliä häm Ğali Karimovlar yäşi Bol'şereç'ye rayonınıñ Qumıslı awılında. Tırşqan tabar, taşqa qadaq qağar dielä xalıq mäqälendä. Dörestän dä, Karimovlar kebeklär taşqa da qadaq qağarlar, dip äytergä mömkin.

Saniä Mirxaleeva, Omski

XS
SM
MD
LG