Bıyılnıñ aprel' ayında Çernobıl' ficiğasına 20 yıl tuldı. Şuşı 20 yıllıq uñayınnan Rusiä prezidentı Vladimir Putin qararı belän Çernobıl' afäten beterüdä qatnaşuçılarnıñ ber öleşenä orden - medal'lär tapşırıla. Şuşı büläklärgä Çallıdan 7 keşe layıq dip tabılğan häm alarğa älege büläklär 18 iyül könne şähär xakimiäte binasında birelde. Älege tantanada çernobıl’çelär isemenä, alarnıñ fidaqärlegenä zur maqtaw süzläre äytelde. Şundıylarnıñ berse mondıy ide : "Monnan 20 yıl elek Çernobl' faciğası näticäsendä Awropağa, böten dänyäğa zur qurqınıç tudı. Barı tik afätne beterergä cibärelgän keşelär, yäğni, sezneñ köç belän genä bu qurqınıç beterelde häm bügen äybät tormışta yäşibez. Sezneñ batırlığığız onıtılmadı,"- didelär alarğa. 4 keşegä "Batırlıq ordenı, 3 keşegä "Ülemgä tarığannarnı qotqarğan öçen" medale tapşırıldı. Şuşı tantanadan soñ "Azatlıq" xäbärçese qayber çernobıl’çelärneñ bügenge tormışı belän qızıqsındı. Ordenğa layıq bulğan Nail Miñnullinnıñ tormış - könküreşe maqtanırlıq tügel, ul fatirsız:
Üz fatirım yuq. Qayçandır aqça eşlärgä çığıp kitkäç, kire qaytuıma, xatın fatirnı mäskäw ölkäsendäge ber şähärgä alıştırıp kitkän. Xäzer aqça tüläp keşe fatirında toram. Başqa yaqları yarap tora. "Batırlıq" ordenı täre räweşendä yasalğan. Şuña kürä, bü ordennı alğan Nail Miñnullinn, büläk aluı küñelle bulsa da, täre formasında buluı oşap betmäde, dide. Şuşı uq ordenğa Ramil Latıypov ta layıq bula. Qızğanıç, şuşı Çernobıl' awıruları näticäsendä ul küptän tügel ülep kitkän, büläkne anıñ xatını Säriä aldı. Säriä xanımnıñ tormışı niçegräk soñ?
"Äybät kenä yäşibez, xoqümät fatir birde, dotatsiälär bar. Barı menä irem genä 20 yıl zur ğazaplardan soñ ülep kitte. Çernobıl’neñ zıyanı tide."
Çernobıl' faciğäsendä qatnaşqan berniçä Çallı keşeseneñ, ğailäseneñ yazmışı menä şundıy.
Ğafiulla Ğaziz, Çallı
