Accessibility links

шимбә, 10 декабрь 2016, Казан вакыты 12:03

«Orgsintez»da yañadan yanğın çıqtı


Qazanda, könneñ berençe yartısında, «Orgsintez» şirkätendä şartlaw buldı digän xäbär taraldı. «Orgsintez» şirkäte Tatarstanda iñ zur häm borınğı şirkätlärneñ berse. Anda polietilen, atseton, fenol häm başqa ximiä äyberläre citeşterelä. Şirkät belän yänäşädä yäşäwçe şähär xalqı nindi dä bulsa yanğın häm şartlaw turında xäbär çıqsa, qurquğa sabışa. Çönki hawağa ağulı gazlar taralü, tirä-yaqqa ekologik zıyan kilü qurqınıçı bar. Şirkättä eşläwçelärneñ äytüenä qarağanda, irtänge yaqta şartlaw tawışı işetelgän, şirkätneñ yäşelçä üsterüçe caylanmalarında, kibettä häm idärä binasında täräzälär qoyılğan. Soñınnan bu xäl turında tulıraq mäğlümat kilde. http://www.kazanorgsintez.ru säxifäsendä şirkätneñ 5 qorılışınıñ bersendä, yanğın çığuı turında mäğlümat basıldı. Anda bolay dip äytelä: irtänge 9.40 yuğarı basımlı polietilennar qorılışında caylanmalar watılıp, çittän hawa kerä başlıy, şartlağan tawış işetelä, soñınnan etilen yanıp kitä. Äylänä tirä möhitkä zur zıyan kilmi, çönki etilen fakelda yanıp bettä. Bolarnı «Orgsintez»nıñ matbuğat xezmäte xäbär itte. Yanğın xäbären ğädättän tış xällär ministrlınıñ matbuğat xezmäte dä rasladı. Yanğın qurqınıçı 3nçe däräcä zurlığında buldı. Şirkätkä 131 keşelek yanğın sünderä otryadı bardı.Ğädättän tış xällär ministrlığınıñ xisabında, şulay uq, yanğın, kompressordan gaz häm hawa quşılması atılıp çığu näticäsendä çığa, dip añlatıla. Ülüçelär häm zıyan kürüçelär yuq. Qazandağı mäğlümat çaraları bu xäbärgä älläni zur iğtibar birmäde, mäğlümatnı bastırmadı. Matbuğat üzäkläre xezmätkärläre dä bezneñ qızıqsınunı añlamadı. Şirkätneñ cihazları iske, andıy xällär «Orgsintez»da yış bula, nigä isegez kitä, didelär. Çınnan da, soñğı tapqır, «Orgisintez»dagı yanğın turındağı xäbär 9 ay elek, 2005 yılnıñ noyaberendä çıqqan ide. Annan soñ, şirkät, citeşeterüdäge qurqınıçsızlığın qayğırtıp, oyränülär dä ütkärde. Ammiak miçkäse şartlasa ni eşlärgä mäsälän, häm başqalar. www.kazanorgsintez.ru säxifäse xäbär itkänçä, şirkättä Rusiäneñ texnik küzäteçelek oyışması, yäğni Rostexnadzor kiñäşmäse ütkän. Anda, «Orgsintez»da sänägäi häm ekologik qurqınıçısızlıknı buldıru yünäleşendä eşlärneñ quyılışı başqa şirkätlärgä urnäk dip äytelgän.

Bikä Timerova

XS
SM
MD
LG