Başqortstannıñ Blagoveşçen şähärendä 2004 yılnıñ dekaberendä militsiä häm OMON tarafınnan ütkärelgän maxsus operatsiä häm anda qaza kürgän yözlärçä keşeneñ şikäyätläre buyınça barğan mäxkämä xaqında äledän-äle xäbär itep torabız. Blagoveşçen şähäre mäxkämäse bu eşne tikşerüne törle säbäplär belän suza kilde häm axırda militsiä xezmätkärläre faydasın qayırğan qararlar çığardı. Şulay da, Başqortstan Yuğarı mäxkämäsendä bu eş centekle tikşerelgännän soñ, militsiä belän dömbäsläşü kiterep çığarğan dip isäplängän öç ir-atnıñ ğäyepsez buluı açıqlandı.
Annan soñ bu eş yañadan Blagoveşçen şähäre mäxkämäsenä qaytarıldı. Şul uq waqıtta Başqortstan Yuğarı mäxkämäsendä Blagoveşçen şähärendäge waqiğalarda ğäyeple dip isäplängän militsiä xezmätkärläre häm alarnıñ citäkçese İldar Ramazanov östennän mäxkämä eşe däwam itte.
Şul arada Blagoveşçen şähäre mäxkämäse bu eştä Blagoveşçen şähäre Eçke eşlär idäräse başlığı İldar Ramazanov belän Başqortstan Eçke eşlär ministrlığınıñ maxsus täğäyenläneştäge köçläre komandirı urınbasarı Oleg Sokolovqa qarata açılğan mäxkämä eşen ayırım tikşerüne sorap, Başqortstan prokuraturasına möräcäğät itte. Ämma prokuratura monıñ belän kileşmiçä, BR Yuğarı mäxkämäsenä möräcäğät itkän ide. Prokuratura wäkilläre äytüençä, Blagoveşçen şähäre mäxkämäse törle yullar belän bu mäxkämä eşen tikşerüne häm ğäyeple militsiä citäkçelären xökem itüne maxsus suzarğa tırışa.
Şulay da Başqortstan Yuğarı mäxkämäse respublika prokuraturası möräcäğäten kire qaqtı. Prokuratura wäkilläre isä bireşergä uylamıy, alar Rusiä baş prokuraturasına möräcäğät itärgä cıyına. Näticädä, Blagoveşçendağı waqiğalarda ğäyeple keşelär östennän mäxkämä utırışları tağın bilgesez waqıtqa qadär kiçekterelde.
İsegezgä töşeräbez, 2004 yılnıñ dekaberendä Blagoveşçen şähärendä militsiä häm OMON xezmätkärläre, maxsus operatsiä ütkärgän çaqta, yözlärçä keşe totqarlanğan häm küpläre qaza kürgän ide. Keşe xoquqların yaqlawçılar bu waqiğalarğa cämäğätçelek häm xoquq saqlaw oyışmaları iğtibarın cälep itkännän soñ, mäxkämä eşläre açıldı häm bügenge köngä qädär ğäyeple keşelärneñ isemnäre atalsa da, alar üz cäzasın almağan.
