Accessibility links

шимбә, 3 декабрь 2016, Казан вакыты 09:47

Ufada Başqortstan Tatar milli mäclese cıyını ütte


Atnakiç könne Ufada Başqortstan Tatar milli mäcleseneñ çirattağı cıyını bulıp ütte. Soñğı waqıtta eşe şaqtıy sülpänäyä töşkän bu milli oyışmanıñ cıyılışları da siräk ütä başlağan ide. Başqortstan tatar milli oyışmaları berlegenä kergän Milli mäcles berlektäge çaralarda qatnaşıp kilsä dä, soñğı çorda anıñ ayırım ğına uzdırğan zur çaraları bulmadı diärlek.

Milli mäcles räise, professor Marat Ramazanov äytüençä, bu xälneñ säbäpläre törleçä. “Ämma, oyışma yañğırawıqlı belderülär häm möräcäğätlär belän çıqmasa da, täğäyen eşlär başqara kilde, - di Marat äfände. – Qıçqırıp yörmäsäk tä, üzebezneñ quldan kilgän eşlärdä üz öleşebezne kertä kildek”.

Başqortstan Tatar milli mäcleseneñ bügen ütkän kiñäşmäsendä uzğan çordağı eşçänlekkä xisap qılındı häm kiläçäkkä qayber burıçlar bilgelände. Mäğlüm buluınça, 29 yüldä Ufada Başqortstan tatar cämäğätçelek oyışmalarınıñ berlektäge zur cıyını ütärgä tieş ide. Anda kütäreläse problemalar tatarlarğa ğına tügel, ä respublikadağı başqa millätlär wäkillärenä dä turıdan-turı qağılası bulğaç, ul cıyınnı tatarlar cıyını dip kenä tügel, ä “Watandaşlar cıyını” dip atarğa buldılar. Menä şul cıyında Başqortstan Tatar milli mäclese wäkilläre dä qatnaşaçaq häm üz fikerlären yañğırataçaq. Ayıruça Başqortstanda bu uqu yılınnan başqort telen mäcbüri uqıta başlawğa qağılışlı belderülär äzerli Başqortstan Tatar milli mäclese wäkilläre. Respublika tatarlarınıñ bügenge xälenä bäyle başqa problemalar buyınça da üz fikeren äytergä niätli alar.

XS
SM
MD
LG