Accessibility links

дүшәмбе, 5 декабрь 2016, Казан вакыты 19:55

Çallılılar Zur Sigezlek sammitı turında


Sankt - Peterburda uzğan "Zur sigezlek" sammitı uñayınnan Çallı keşelärendä nindiräk fikerlär tuğan. Monı şähärdä çığuçı atnalıq gäzitlärdän berqädär toyımlap bula. Pänceşämbe könne çıqqan "Veçernie Çelnı" gäzite sammit uzğannan soñ, "Amerika bezgä närsä belän yanıy?" digän isem astında soraşular uzdırğan häm qayber belgeçlärneñ fikerlären uquçılarğa da citkerä. Çınnan da, Amerika Rusiägä nindi qurqınıç tudıra soñ? Texnik fännär doktorı, professor Boris Kuznetsov gäzit korrespondentına bolay di :"Ğomumän alğanda, sammit bezgä ber närsä dä birmäde, diärlek. Ber genä uñay küreneş bar, Rusiä "Zur sigezlek"tä üz urının saqlap qala aldı. Xäzer inde bez Quşma Ştatlar aldında bil bökmäyäçäkbez. Närsä belän kileşergä yäki kileşmäw yulın saylarğa mömkinlegebez bar. Amerika üzeneñ beryaqlı ğına säyäsäte belän bezneñ öçen qurqınıç tudıra, läkin, bezneñ qarşı torırlıq resurslarıbız bar. Monıñ östenä, "ağuğa qarşı daru" barlıqqa kilde. Ul - dönya küläm liderlıq öçen köräşergä cıyınuçı Qıtay." Bu- professor Boris Kuznetsov süzläre. Çallı pedagogiä institutınıñ sotsial' - iqtisat kafedrasınıñ politologiyä häm sotsiologiä fännäreneñ ölkän uqıtuçısı Färit Kanikov ta AQŞ yağınnan qurqınıç bar, dip sanıy. Ul bolay di, :"Sovet zamannarınnan uq Rusiä häm Amerika mönäsäbätläre qatlawlı häm qarşılıqlı. Ber yaqtan bez alar belän xezmättäşlek itärgä telibez, ikençe yaqtan, tışqı häm eçe säyäsättä möstäqillek xoquqlarınıñ yaqlarğa omtılabız. Ğomumän, şuña kürä, ilneñ saqlanu çaraların nığıtırğa kiräk. İke il arasındağı qarşılıq sammitta da kürende. Mäsälän, Livan - İzrail' konfliktı buyınça Amerika İzrail'neñ köç qullanu säyäsäten yaqlarğa teläk beldersä, Rusiä - tınıç söyläşülär yaqlı." Säyäsät fännäre ölkän uqıtuçısı Färit Kanikov şundıy fikerdä. Şulay uq, geografiä fännäre kandidatı Tat'yana Çernışeva da şuşı süzlärne xuplıy : "AQŞ yağınnan bezgä qurqınıç yanıy,- di ul. Bügen ul dönyada iñ köçle derjava häm bezgä anıñ belän mönäsäbätlärne bik uylap buldırırğa kiräk. Şunısın da istä totıp eşläw zarur, Amerikanıñ ükçäsenä basıp kilüçe, dönyanıñ tağın ber liderı bulğan Qıtay belän bağlanışlarnı da caylawnı onıtmasqa kiräk. Monıñ östenä, Bäysez däwlätlär berdämlege illäre, ayıruça Ukraina belän mönäsäbätlärne betermäskä kiräk."

Älege fikerlär Çallıda çığuçı "Veçernie Çelnı" gäzitendä "Amerika bezgä närsä belän yanıy?" digän mäqälädän alındı.

Ğafiulla Ğaziz,Çallı

XS
SM
MD
LG