Accessibility links

җомга, 9 декабрь 2016, Казан вакыты 08:45

Liban köç qullanunı tuqtatunı sorıy


Liban premyer-ministrı xalıqara cämäğätçelekkä yardäm sorap möräcäğät itte. İzrail isä, Libanda xärbi çaralarnı – Hizbulla suğışçıları yuq itelgänçegä qadär däwam itäçägen belderde. Qorallı nizağ inde ikençe atnasına kitte. BMOda nizağnı diplomatik yullar belän çişü turında baş watalar.

Liban premyer-ministrı Fuad Siniora, köç qullanunı niçek bulsa da tuqtatırğa soradı:

"Kiçekmästän atışlarnı tuqtatap, suğış näticäsendä cimerelgän bu ilne qamawdan çığarıp humanitar yardäm cibärübe sorıybız."

Bügen atışlarnıñ 9nçı köne, şul 9 kön eçendä Libanda kimendä 300 keşe häläk buldı, 1 meñgä yaqını yaralandı. Qorbannarnıñ kübese – tınıç xalıq. 500 meñgä yaqın keşe, yağni xalıqnıñ 8dän ber öleşe – öylären taşlap kitergä mäcbür buldı. İzrail yağında 29 keşe häläk buldı, alarnıñ 14se – xärbilär.

Nizağ 9 kön elek Hizbullanıñ 2 İzrail xärbien totıq itep aluınnan başlanıp kitte. Liban – köç qullanunı tuqtatırğa çaqıra, İzrail isä, maqsat bar, häm anı ütäw kiräk, dip belderä. İzrailneñ qanunçığaru şurası wäkile Efraim Sneh fikere:

"Bezneñ maqsatıbız Hizbollanı yuq itü, maqsat ütälmi torıp köç qullanu tuqtalmayaçaq. Maqsat tulısınça ütälmäsä – höcümnärne tuqtatunıñ mäğnäse yuq, çönki Hizbulla üze telägän çaqta köç qullanunı yañadan başlayaçaq, bez bu xällärneñ qabatlanuın telämibez."

Köç qullanunı tuqtatu öçen İzrail öç şart quydı.

-Hizbullanıñ İzrailgä raketa höcümnären tuqtatuı -totıq itep alınğan ike İzrail xärbieneñ azat itelüe -Könyaq Libandağı Hizbulla cirläreneñ Liban ğaskärläre kontrolenä küçüe

Älegä İzrailneñ xärbi çaraları Hizbollağa äz genä bulsa da täsir itmäde. Hizbulla suğışçıları könyaq İzrail şähärlärenä raketa artınnan raketa ata. Çärşämbe könne berençe tapqır tarixi Nazareth şähärenä raketa höcüme buldı, anda İzraildä yäşäwçe ike ğäräp balası ülgän. Uzğan töndä İzrail könyaq Libanda Hizbullanıñ yuğarı citäkçelege yäşerengän dip şiklänelgän cirlärgä 23 tonna bomba atqan. Hizbulla televideniäse, höcümndä häläk buluçılar yuq, dip xäbär itte.

Töbäktä wazğiät suğış çorında kebek. Yevropa illäre, AQŞ töbäktän üz watandaşların çığara. Bügen 1 meñgä yaqın amerikan keşese utırğan berençe köymä Libannan Qıbrısnıñ Larnaka şähärenä kilep citte. AQŞ watandaşların Libannan çığarırğa 2200gä yaqın amerikan xärbie yardäm itä. Britaniä, Gresiä, Fransiä, Avstraliä, Şvesiä Libanğa üz köymälären cibärde. Rusiä üz watandaşları belän bergä BDB illäre keşelären dä çığarırğa yardäm itä. Ä qalğan xalıqqa isä xalıqara cämäğätçelek inde aqça cıya başladı. Yevropa Komissiäse 10 million yevro bülep birüen xäbär itte.

BMOnıñ İminlek Şurasında nizağnı xäl itü çarası turında berdäm fiekr yuq. Äle genä Yaqın Könçığıştan qaytıp töşkän general sekretar Kofi Annan çığış yasıy. Ul xäl itü çarası turında xalıqara cämäğtçelekneñ fikerläre ayırıla. Waşington, İminlek Şurasınıñ köç qullanunı tuqtatunı taläp itkän rezolüsiäsenä qarşı çığa. Britaniä premyerı Tony Blair da, xärbi çaralarnı tuqtatunı taläp itü döres bulmas ide dip sanıy. Rusiä häm Fransiä köç qullanunı kiçekmästän tuqtatırğa çaqıra.

Alsu Qormaş
XS
SM
MD
LG