Accessibility links

якшәмбе, 11 декабрь 2016, Казан вакыты 07:09

Saakaşvili Mäskäwgä barmıy, anıñ urınına Grzuiä xökümäten eşennän ala


Comğa könne Gruziä prezidentı Mixail Saakaşvili üz ileneñ Rusiä belän tämam naçarayğan mönäsäbätlären beraz yaxşırtırğa tırışıp qaramaqçı ide. Bäysez däwlätlär berdämlege citäkçeläreneñ Mäskäwdäge ğäyre räsmi oçraşuı qısalarında ul Vladimir Putinne kürep söyläşergä teläde. Tik Rusiä citäkçeseneñ moña waqıt tapmayaçağı bilgele bulğaç, Saakaşvili Tiflistä qalıp üz iğtibarın Gruziä xökümäten üzgärtep qoruğa bağışlarğa buldı.

Soñğı aralarda üzendä törle yuğarı däräcäle qunaqlarnı qabul itü belän mäşğül bulğan Putin şaqtıy çetrekle xäldä qaldı - Bäysez däwlätlär berdämlege citäkçeläreneñ Mäskäwdäge ğäyre räsmi oçraşuında Mixail Saakaşvili genä tügel, Ukraina, Törekmänstan häm Ärmänstan prezidentları da bulmayaçaq. Viktor Yuçenko Ukraina xökümäten qoru tiräsendäge qatlawlı wäzğiatne xäl itä, Robert Koçaränneñ kinät kenä sälämätlege naçarayğan, ä Saparmorad Niazov ğomumän cäyge yalda.

Saakaşvili Mäskäwdä Vladimir Putin belän oçraşıp, ike il arasındağı kierenkelekne kimetü, Rusiäneñ Könyaq Osetiä häm Abxaziädäge tınıçlıq köçläre turında söyläşmäkçe ide. Ämma Mäskäw yağınnan yasalğan işärälär, Rusiä prezidentınıñ Saakaşvili belän oçraşırğa bik aşıqmawın kürsätte. Putinneñ yardämçese Sergey Prixodko, "oçraşu bulırmı, yuqmı, tögäl äytä almıym, gruzin yağınıñ üteneçe bar, ämma oçraşu waqıt qalsa ğına, häm bez anıñ artında konkret ğämällär toraçağın kürsäk kenä bulaçaq", dip belderde.

Moña cawap itep Gruziä prezidentı Mäskäwgä barudan baş tarttı. Häm ilneñ xökümäten eşennän alıp, premyer Zurab Nogaydeligä yañasın tözü burıçın yökläde. Şuşı üzgäreşlär nigezendä Gruziäneñ üzendäge nizağlarnı xäl itü eşen alıp baruçı däwlät ministrı Giorgi Xaindrava eşsez qala. Bu urınında Mäskäw belän kübräk ul aralaşa ide.

Xaindravanı eşennän alu räsmän añlatılmadı, ul arada Tiflistä dä, Könyaq Osetiä başqalası Tsxinvalidä dä, Saakaşvili nizağlarnı xäzer qorallı yul belän xäl itüne saylıy ala, ä Xaindrava anıñ bu ölkädäge ömetlären aqlamadı, digän farazlar çıqtı. Eşennän alu säbäplären Giorgi Xaindrava uze dä belergä teli:

"Älbättä, min bu qarar artında ni toruın belergä telär idem, çönki minemçä, min berqayçan da, ber genä mizgelgä dä, prezident yöklägän solıx säyäsätennän taypılmadım", di Gruziäneñ xäzer inde elekke däwlät ministrı Xaindrava.

Şuşı soñğı üzgäreşlär aldınnan ğına Gruziä parlamentı inde 15 yılğa yaqın Tiflis xakimiaten tanımıy yäşägän Abxaziä häm Könyaq Osetiädän Rusiäneñ tınıçlıq saqlaw köçlären çığaru taläbe belän maxsus qarar qabul itkän ide. Gruziä Mäskäwne şuşı ike töbäktäge üzidaräne yaqlawda, Abxaziä häm Könyaq Osetiäne üzenä quşu teläge belän yäşäwdä ğäyepli.

Rusiä bu könnärdä Gruziä çige yanında ğına xärbi künegülär ütkärä, gruzin räsmiläre monı da Rusiäneñ çın niätlären kürsätkän ğämäl, dip bäyäli. Mäskäw isä, künegülär yardämendä Abxaziä häm Könyaq Osetiädäge tınıçlıq köçlärenä bulışu mömkinlekläre sınala, dip belderä.

Kärim Kamal
XS
SM
MD
LG