Accessibility links

якшәмбе, 11 декабрь 2016, Казан вакыты 07:05

Dönya cämäğätçelege häm xalıqara oyışmalar Liban krizisın cayğa salu öçen tırışa


Şimbä könne İzrailneñ xärbi oçqıçları Libannıñ üzägendäge häm ilneñ tönyaq öleşendäge teletapşırğıçlarnı häm telefon elemtäse manaraların bombaladı.

Bäyrut qırıyında yäşäwçe xanım bolay dip söyli: “Bez härçaq ayaq östendä. Yäşerenü urınnarına qaçarğa turı kilä. Tönnärne ütkärü üze ber ğazap. Ämma Allahı täğalä bezne saqlıy, keşelärne häm ilne saqlıy, balalarnı saqlıy. Balalarnıñ ber genä dä ğayebe yuq bit”. İzrailneñ xärbi citäkçelege Libannıñ könyağında “çiklängän operasiä” ütkärelüen rasladı. İzrailneñ meñlägän xärbie häm timer belän tışlanğan xärbi texnikası Liban çigenä kiterelgän. Şul uq waqıtta, xärbilär wäkile “Reuters” agentlığına, Libanğa älegä kiñ külämdä basıp kerü turında süz barmıy, dip belderde.

Berläşkän Millätlär Oyışmasınıñ general'' sekretare Kofi Annan Quşma Ştatlarnıñ CNN telekompaniese aşa çığış yasap, Liban humanítar hälakät yulına taba bara dip, xäweflänü belderde. Anıñ äytüençä, yartı millionnan artıq keşe öylärennän kitärgä mäcbür bulğan. 150 meñ libanlı Süriädä sıyınu urını tapqan. Berläşkän Millätlär Oyışmasınıñ humanítar yärdäm belgeçe Jan Egeland İzrailneñ bombalawınnan soñ ğadi xalıqnıñ xälen açıqlar öçen Libanğa kilä. Kitär aldınnan ul ilgä xalıqara humanítar yärdämne kiterü mömkinlege turında bolay dide: “Humanítar yärdämne kiterü härwaqıt awırlıqlar tudıra. İlneñ küp öleşenä anı kertü iminlek belän bäyle bulsa, cimereklär alıp baruğa kirtä bulıp tora”.

11 kön däwamında Libannı hawadan utqa totu näticäsendä 345 keşe hälak buldı. Xizbulla ğisyançıları raketadan atıp 33 izraillene üterde. Xizbulla ğisyançıları şimbä İzrailneñ Xayfa şähären qabat utqa tottı. Anda ul waqıtta İzrail xökümäte wäkile Avi Pazner bulğan. Ul: “Sirenä tawışları işetelä. Xayfa tağın utqa totıla. Xizbulla - İran teläklären ütäwçe bularaq - İzraildäge tormışnı cimerergä, İzrail häm Liban xalqına ğazaplar kiteregä teli. Bez bu qanlı oyışmanıñ köçen yuqqa çığaraçaqbız. Bez anı härqayda häm härqayçan ezärleklärbez”, dide.

Dönya cämäğätçelege häm xalıqara oyışmalar Liban krizisın cayğa salu öçen tırışa. Yaqın Könçığışqa Germanianeñ tışqı eşlär ministrı Walter Steinmeyer kitte. İke yıl elek ul qulğa alınğannarnı almaşu turındağı söyläşülär ütkärgändä İzrail häm Xizbulla arasında aradaşçı bulğan ide. Fransiäneñ tışqı eşlär ministrı Philip Dost-Blazi Libanda inde. Ul bolay dide: “Min Xizbullanı qoralsızlandıru kiräklege belän tulısınça kileşäm. Bu iñ möhime. Aña utnı tuqtatqaç qına ireşep bulaçaq. Bügen köç qullanğanda, minem uyımça, diplomatík çişeleş tä, alğa kiteş tä bulmayaçaq”. Yäkşämbe könne bu töbäkkä Quşma Ştatlarnıñ däwlät sekretare Kondoleezza Rice kiläçäk. Ul, Liban problemasın tulayım alğanda ğına çişärgä mömkin, di. Çärşämbe İtaliädä Liban krizisın cayğa saluğa bağışlanğan xalıqara konferensia başlanaçaq.
XS
SM
MD
LG