Accessibility links

якшәмбе, 4 декабрь 2016, Казан вакыты 09:19

Ğiraqta yänä qanlı yäkşämbe - şartlawlarda distälärçä keşe ülde


Bağdadta bomba quyılğan ike maşína şartlağan. Şığıylar bistäsendä bulğan bu şartlawlarda kimendä 41 keşe ülgän, berniçä distä keşe yaralanğan. Öçençe şartlaw ilneñ tönyäğındağı Kirkuk şähärendä bulğan. Anda 15 keşe ülgän, 50 keşe yaralanğan. Quşma Ştatlarnıñ Ğiraqtağı xärbi citäkçelege, Bağdadtağı atışlar waqıtında 15 qorallı baş kütärüçe häm ğiraq politsiäseneñ ber xezmätkäre üterelgän, dip belderä. Quşma Ştatlarnıñ ber xärbie yaralanğan.

Xalıqara xoquq yaqlaw oyışması “Human Rights Watch”nıñ yäkşämbe iğlan itelgän xisabında Ğiraqtağı amerikan xärbiläre soraw alğanda räximsez alımnar qullanunı däwam itüe äytelä. Xoquq yaqlawçılar belderüençä, 2003-nçe yıldan alıp 2005-nçe yılğa qädär amerikan xärbiläre tikşerü eşe alıp barğanda Ğiraq törmälärendägelärne yoqısızlıqtan intektergännär, yäki bik yuğarı häm tübän temperaturalarda totqannar. 2004-nçe yılnı Ğiraqnıñ Äbu Ğrayb törmäsendäge totqınnarnı qatı cäberläw dönyağa bilgele bulğan ide. Bu törmädä utıruçılarnı mäsxärälägän Quşma Ştatlarnıñ 10 xärbie cawapqa tartıldı.

Ğiraqnıñ elekke başlığı Säddam Xösäenne, açlıq iğlan itüenä 17 kön bulğanda xastaxanägä urnaştırğannar. Bu xaqta mäxqämädä Ğıyraq diktatorın häm anıñ xezmättäşlären töp ğäyepläüçe Cappar Äl Mussawi könbatış jurnalistlarına belderde. Anıñ süzlärençä, düşämbegä bilgelängän mäxkämä utırışında Säddäm Xösäenneñ qatnaşuı ikele. Ä Ğiraqtağı amerikan xärbi citäkçelege, Ğiraqnıñ elekke diktatorı Säddam Xösäen mäxkämägä kilerlek xäldä, di.
XS
SM
MD
LG