Accessibility links

Кайнар хәбәр

Tanılğan din ähele İdris xäzrät Ğäläwetdin Sembergä kilde


Qızğanıç ki, barça imamnarıbız da tirän eçtälekle wäğäzlärgä sälätle, dip bulmıy. Küp mäxällälär imamnarı mäçetlärdä namaz uqu häm Xaq Täğälädän “tege” dönyada şäfqät yalwaru belän çiklänälär. Döres, wäğäz ostalığı belän tanılğan imamnarıbız da bar, tik bik az alar. Başqa imamnarıbıznıñ da hönär’ ostalığın kamilläşterü maqsatınnan, Sember ölkäseneñ Üzäk Diniä nazäräte möftie Fatıyx xäzrät Aliullov Çallıdan kürenekle wäğäz ostası, tirän belemle din ähele İdris Galävetdinnı ber atnağa qunaqqa çaqırğan. Ul imamnar öçen 5 könlek seminar-kiñäşmä uzdırdı. Anda menä nindi temalar iğtibar üzägendä buldı. “Yäş buınnı tärbiäläwdä häm tormışqa äzerläwdä imamnar role (eşçänlege)”, “Qor'än häm Sönnät buyınça aqıl üseşen tärbiäläw”, “Qor'än häm Sönnättä äxlaqi sistema nigezläre”.

Seminarda eçkersez fiker alışular buldı, imamnar küp sorawlarğa cawaplar taptılar. Bu çaradan tış İdris xäzrät ölkä üzägeneñ 5 mäçetendä öylä namazları aldınnan wäğäz tottı. Aldan birelgän iğlannar bik küp keşene cälep itte. Şul isäptän xatın-qızlarnı da.

Ölkä üzägeneñ Timeryul rayonındağı “Äl-İslam” mäçetenä comğa namazına kilgän İdris xäzrätne, ğädättägeçä, ber törkem xäyer sorawçılar qarşıladı. Qunaq barısına da aqça öläşte. Ğorur tatar xalqınıñ ber waqıtta da xäyer soramağanına basım yasap, İdris xäzrättän sadaqa öläşüeneñ mäğnäsen häm maqsatın sorarğa turı kilde. Ul üz ğämälen Qor'än-Kärim taläbe belän nigezläde.

“Läkin sadaqa sorawçılarnıñ moxtaclığı şik uyata, çönki Tacikstannan, Üzbäkstannan kilep urnaşqan “lälü”lärneñ yäşäw räweşe şul bit. Annan soñ, moxtac keşe sadaqanı da bik uñaysızlanıp qına sorıy, ä bolar küzeñä kerep, qulıñnan tartıp alırday soranalar. Mondıy yumartlıq alarnıñ şundıy yäşäw räweşen xuplaw bulıp çıqmıymı soñ?” – digän sorawğa İdris xäzrät “Gönahı üzlärenä bulır, ä min alarnıñ moxtacmı-tügelme ikänen belmim, şunlıqtan az ğına öläşep bulsa da, Xaq Täğälä taläben ütädem, dip sanıym. Ä moxtac bulmağannarğa da sadaqa birüneñ gönahı yuq”, - dide.

İdris xäzrätkä birelgän ikençe soraw citdiräk ide. Maxsus xezmätlärneñ Rusiäküläm cıyını urını itep näq Tatarstannıñ başqalası Qazannı saylaw säbäpläre turında. Ällä inde Tatarstannıñ ekstremistlarnı küpläp totu täcribäse başqalar öçen dä ürnäk sanalamı? Läkin äñgämädäş bu sorawğa cawap birä almawın belderde. Farazlar ğına qorırğa mömkin, dide. Ul şulay uq Tatarstanda ekstremizm-terrorizmda ğäyeplängän yegetlärneñ cinayät qılu-qılmawları turında da fiker yörtü qıyınlığın äytte, çönki anıq fikergä kiler öçen, ike yaqnı da tıñlap qararğa kiräk. Ä bezdä andıy mömkinleklär yuq, dide.

Ä menä İslam dinen törle mäğlümat çaralarında pıçratunıñ säbäplären qunaq berqädär çamalıy ikän. Çönki bügenge zamanada İslam dine arta, köçäyä bara. Parijnıñ üzendä genä 700 mäçet. Fratsiädä 4000 mäçet. AQŞta 6 million möselman. Mäskäwdä ber yıl eçendä 5000 keşe, urıslar, İslam dinen qabul itkännär. Dimäk, mondıy wäzğıätne qabul itä almawçılar İslam dinen pıçratıp, wäzğıätne ikençe yaqqaraq borırğa tırışalar. Ä “terrorizm töşençäsenä kilsäk, anıñ başqa misalları belän dönya tulğan.

İdris xäzrätneñ Comğa namazı da İslam quşqança yäşäw räweşe turında buldı.

Dinebezgä qağılışlı tağın berniçä süz. Rusiäneñ Möftilär şurası räise Rawil xäzrät häm Tatarstan möftie Ğoman xäzrätneñ Sember Sabantuyında qatnaşuları turında xäbär itkän idek inde. Cirle citäkçelek belän äñgämädä alar ölkädä ber genä möfti bulırğa tieşlege turında urtaq fikergä kilgännär.

İke möftineñ berse Fatıyx xäzrät äytüençä, ul da, Säwbän xäzrät tä bu wazifadan kitärgä tieş, başqa keşe tabarğa qarar qılğannar. Fatıyx xäzrät üze isä “Möfti wazifasına yabışıp yatmıym, dinebezne torğızu yağınnan başqa eşlär dä muyınnan”, - di. Läkin şart ta quya: yaña möfti Rawil Gaynetdin tarafdarı bulırğa tieş. Säwbän xäzrät Söläymanovnıñ isä niätläre älegä bilgesez.

Ayrat İbrahim, Sember

XS
SM
MD
LG