Ozaq yıllar däwamında Tatarstanda ike xalıqara hawa alanı eşläp kilde. Alarnıñ berse Qazanda, ikençese Çallı belän Tübän Qama şähärläre arasında bulğan "Bigeş" hawa alanı. 1995 yıllarda ğına Bigeşkä xalıqara iseme birelde häm menä soñğı yartı yılda bu hawa alanınıñ xalıqara statusın alu turında küp süzlär yörde. Çınnan da, Rusiä xökümäte däräcäsendä oyıştırılğan maxsus komissiä Tatarstanğa xalıqara statusqa iä bulğan ike aeroport kübräk dip sanadı bulsa kiräk, xätta, "Bigeş"neñ ni öçen yabılırğa tieşlege turında tikşerü näticälären dä bäyän ittelär, yänäse, uzğan yıl, biregä oçıp kilgän häm oçıp kitkän passajirlar sanı 5 meñnän kim bulğan. Şulay da Tatarstan citäkçeläre "Bigeş" hawa alanınıñ respublika, Rusiä külämendä möhim urın alıp toruın dälilli aldılar. Xäzer inde, iqtisadıy yaqtan üsep kilüçe Qama ar'yağında xalıqara hawa alanı bulırmı digän sorawğa noqta quyıldı. Hawa alanı bulaçaq häm federal' üzäk üzgärtep qoru eşlärenä aqça da biräçäk. Bu xaqta uzğan atna azağında Tatarstannıñ transport häm yul ministrı Vladimir Şvetsov matbuğat konferensiäsendä belderde. "Bigeş"ne üzgärtep qoruğa 500 million sumnan kübräk aqça kiräk bulaçaq.
Nindi üzgäreşlär kötelä? Qaysı illärgä hawa yulları açıla? Şuşı sorawlar belän "Azatlıq" xäbärçese Tatarstan "Hawa kompaniäläre"neñ Tübän Qamadağı filialı citäkçese Valeri Sevryukovqa möräcäğät itte. Anıñ süzlärençä, berençe çiratta xalıqara sektornı, andağı tikşerü - küzätü caylanmaların kiñäytergä, hawa qurqınıçsızlığın üsterergä häm başqa xalıqara taläplärne ütärgä turı kiläçäk.
İnde, "Bigeş"tän qaysı illärgä yul açıla digän sorawğa cawap mondıy:
"Monısı, iqtisadıy irekle zona sanalğan Alabuğanıñ kiläçäktäge üseşe belän bäyle. Şulay uq, Tübän Qamadağı neft', ximiä zavodlarınıñ, KamAZnıñ çit il partnerları, investorları belän moña qädär bulğan elemtäläreneñ ni däräcädä alğa kitüennän tora. Ekipajlar äzer, hawa alanı barlıq taläplärgä cawap birä, bez teläsä qaysı ilgä oçarğa äzer"- di "Bigeş" hawa alanı citäkçese Valeri Sveryukov. Anıñ äytüençä, Mäskäw häm Mäskäw ölkäsen sanamağanda, Rusiäneñ ber genä regionında da, yäğni respublikalar bulsın, ölkälär bulsın, ike xalıqara hawa alanı yuq.
Ğafiulla Ğaziz, Çallı
