Accessibility links

пәнҗешәмбе, 8 декабрь 2016, Казан вакыты 05:16

Kama Alanı afättän qotqarmıyaçaq


Tatarstanda otışlı, qomarlı, azartlı uyınnarnıñ oyası bulğan kazinolarnı Tübän Qama rayonınıñ Qama Alanı poselığına küçerü turında respublika xökümäte qararı şaqtıy bäxäslär tudırdı. Kazinolarnı şähär häm rayonnardan cıyıştırıp, qayçandır atom stansiäse tözelergä tieşle Qama Alanına küçerü xaqındağı xäbär otışlı uyınnarda törle yaqlap zıyan kürüçelärdä xuplaw taptı. Ä menä şuşı uyın bazarın üz qullarında totuçılar kiresençä, ber urınğa tuplawğa qarşı çıqtılar. Xätta, xökümät qararı belän riza bulmıyça, qayber kazino xucalarınıñ mäxkämägä märäcäğät itüläre xaqında xäbärlär buldı. Din ähelläre otışlı uyınnarğa nindi qaraşta? Kazinolarnıñ üzäge bulırğa tieşle Tübän Qama rayonı häm şähärendä nindi fikerlär bar? Şuşı uñaydan "Azatlıq" xäbärçese Tübän Qamanıñ Üzäk mäçete imam-xatıybı Yosıf xäzrätkä möräcäğät itep, mondıy cawap aldı:

- Min, din ähele bularaq, Allaheneñ Qor'änenä qaytırğa tieşmen häm anda otışlı uyınnarnıñ zararın bik xikmätle itep añlatıla. Allahe Täğälä äytä, ul närsälärdä bardır sezgä ber fayda häm ber zıyan, di. Läkin anıñ zıyanı faydağa qarağanda kübräk, di. Elegräk, irlärebez, balalarıbız araqı eçälär, suğışalar dip kemnärneñder ğäziz xatınnarı, äti-äniläre kilä ide. Xäzer inde 50, 100 meñ, berär millionğa qädär aqça ottırğan keşelärneñ tuğannarı kilä başladı. Bu - zur afät. Kazinolarnı Qama Alanına küçerüne izge niättä kürsätergä telilär. Bu - yäşlärne araqı eçmäsennär dip, sırağa küçergän kebek. Bilgele ki, sıra da bik zıyanlı. Läkin, islam dine monı töptän, tamırdan özü yağında.

Keşeneñ balaçaqtan uq naçar ğädätlärdän arındıru öçen döres tärbiä birergä kiräk, dip sanıy Yosıf xäzrät. Anıñ fikerençä, bu oçraqta cäyge yallarnı oyıştıru şaqtıy näticä birä:

" Cäy - balalarnıñ iñ iğtibarsız qala torğan waqıtı. Uramdağı "bürelär" balalarıbıznı urlıylar. Bu- eçkeçelektä, faxişälektä, şul uq otışlı uyınnarda çağılış taba. Balalarnı ädäp- äxlaqqa öyrätüdä köçtän kilgänçä tırışabız- cäyge yalların oyıştırabız"

Aldağı yıllarda Yosıf xäzrät Sarman mäçeteneñ imam- xatıybı bulıp torğan ide. Biredä balalarnıñ yalların oyıştıruda başlap yörde. Menä bu cäydä Sarmannıñ üzendä berençe smenada malaylar yalı ütte inde. Xäzer 100гә yaqın qız bala ike atnalıq yalda. Şulay uq, Tübän Qama rayonınıñ Yuğarı Çallı awılında berençe smenada 90, ikençe smenada 55 bala cäyge yalların ütkärgännär. İmam xatıyp süzlärençä, ikençe smena täcribä räweşendä ütkän, yäğni, uquçılar urmanda, çatırlarda yäşägännär. Ciläk aşap, balıq totıp, tabiğät belän aralaşqannar, şul uq waqıtta namaz uqıp, din däresläre nigezlären dä öyrängännär. Häm menä bügenge köndä şähärneñ tatar - törek litsey binasında 105 qız bala yal itä. "Şuşındıy yallar iğänäçelär yärdäme belän oyıştırıla. Kem 1мең sum, kemder 3мең sum aqça birä," - di Tübän Qama şähäreneñ Üzäk mäçete imam-xatıybı Yosıf xäzrät.

Ğafiulla Ğaziz, Tübän Qama

XS
SM
MD
LG