Rusiä saqlanu ministrı Sergey İvanov, Venezuelağa satılaçaq qoralnıñ nindi buluı xaqında äytkändä, Mäskäw aña höcüm oçqıçlarınnan tış, 30 xärbi boralaq ta sataçağın äytkän ide. Şul mäğlüm, küptän tügel genä Venezuelağa şundıy boralaqlarnı Qazandağı boralaq berläşmäse satqan ide. Rosoboronexportnıñ Tatarstandağı wäkile Mixail Tixonov Tatar-inform agentlığına, xäzer satılaçaq boralaqlar da Qazannan bula ala, dip belderde. Qoral alğan il öçen şul möhim - texnika wä cihaznı ul ber citeşterüçedän alırğa tırışa, çönki bu alarnı qullanu häm kiräk bula qalsa remontlaw yağınnan qarağanda arzanğaraq töşä", di Rosoboronexport wäkile. Berük waqıtta Mixail Tixonov, süzneñ niçä boralaq turında bara aluı xaqında sannar äytmi, bu mäğlümat barı tik Hugo Chavez säfärennän soñ, yäğni kileşä imzalanu belän genä bilgele bulaçaq", di.
Elegräk satılğan partiädän Venezuela yağınıñ qänäğät qaluı mäğlüm, Qazan boralaqları Venezuela başqalası Caracasta ütkän xärbi paradta kürsätelgän ide. İlneñ xärbiläre alarnı Venezuelanıñ saqlanu qüäten nığıtu öçen genä tügel, ä xalıq xucalığında da, misal öçen, ilneñ başqa transport çaralı belän barıp bulmağan poçmaqlarına citü öçen dä qullanmaqçı - prezident Chavez üzen yarlılarnı yaqlawçı, alarğa bulışuçı itep kürsätergä tırışa, häm bu maqsatta ul yış qına xärbilärneñ mömkinleklären dä faydalana.
Boralaqlar küpläp alınğan oçraqta Venezuelada alarnı xezmätländerü üzägen tözü dä küz aldında totıla, moñardan tış Caracas, oçuçılarnı äzerläw öçen üzendä maxsus künegülär üzägen buldıru kiräklegen dä äytä. Bu oçraqta Qazan texnikası öçen Venesuelada kiñ bazar açıla ala. Tatarstan başqalasında citeşterelgän saqlanu texnikasın häm cihazların, küptän tügel genä Qazanda bulıp kitkän Sergey İvanov - Rusiäneñ vitse-premyerı häm saqlanu ministrı da maqtağan ide.
Gölnaz İlgizär
