Accessibility links

пәнҗешәмбе, 8 декабрь 2016, Казан вакыты 19:14

Radik Xäbirov öçen kem cawap birer?


İke atna däwamında 19 yäşlek Radik Xäbirov Qazannıñ veterannar gospitalendä yata. Bu könnärdä anı reanimatsiädän baş mie awıruları bülegenä küçergännär. Xäzer Radiknı sistema aşa tügel, ä köpşä belän aşatalar. Gospital'dä bik qimmätle häm sıyfatlı darular belän yeget buşlay tä'min itelä. Soñğı könnärdä Radiknıñ awırlığı 3 kiloğa artqan. Ämma anıñ xäle haman da bik awır bulıp qala. Ul märtkä kitkän xäldä qala. Häm mondıy xalät bik ozaqqa suzılırğa mömkin di tabiplar. Totsk xärbi bülegendä üz üzen buarğa tırışuı, yegetneñ baş mie, nerv sistemasına bik zur zıyan kitergän. Radikta bulğan ensefalopatiä yäğni baş mie awıruı bolay da bik qatlawlı, ä buılu näticäsendä barlıqqa kilgäç, anı däwalaw tağın da awırraq. Döresräge ul däwalanmıy da. Radiknıñ bügenge xäle turında veterannar gospitale baş tabibı Färit Zakirov söyli:

Bügenge köndä Radiknıñ xäle awır bulıp qala. Anıñ xäle naçar yaqqa üzgärmäde. Ämma yaxşığa da bernindi üzgäreşlär yuq. Kiläçäk turında äytüe bik awır, çönki yegetneñ baş mie bik nıq zägıyf'längän, ä nerv küzänäkläre bilgele bulğança bik awır rätlänä. Şuña kürä yegetneñ xäle bik tä naçar.

Qazannıñ veterannar gospitale baş tabibı Färit Zakirov buldı.

Ä ber yıl elek Säyetgäräy Xäbirov saw-sälämät ulın armiägä ozatqan bulğan. Yartı yıl xezmät itkäç, Säyetgäräy äfändegä ulınıñ armiäne taşlap kitüen xäbär itkännär. Moñarçı isä Radik ätisenä ber-ber artlı xatlar cibärep torğan, xezmät itüe bik ciñel tügel, ämma tüzärlek digän. Ber ay çaması yuğalıp torğaç, Radik xärbi bülekkä qaytqan, ämma bik awır xäldä. Annarı anı xärbi gospital' kötä. Näq şunda yeget üz üzen buarğa tırışqan dip bara xärbilär. Ämma Säyetgäräy ulınıñ mondıy ğämällär qıluına ışanmıy, ul bu eşlärdä armiä ğına ğayıple dip sanıy.

Radik öçen kem cawap birer soñ? Yeget xezmät itkän Totsk şähäre prokuraturası tikşerülär uzdırıp, Radik xärbi bülekne qaldırıp kitärlek bernindi köç qullanılmadı aña qarata digän näticälär çığarğan. Alar äytüençä, yeget xärbi xezmättän yal itär öçen häm tuğannarı belän oçraşu niätennän kitep torğandır.

Bu könnärdä İdel buyı Ural xärbi okrugı prokuraturası cinayät eşe quzğattı. Xäzer tikşerülär bara. Radiknıñ eşe “Agora” dip atalğan töbäqara xoquq saqlaw oyışmaları assotsiatsiäsenä küçerelegän. Assotsiatsiäneñ wäkile, advokat Rämil Axmetğaleev Radiknıñ eşen nıqlap öyränü öçen bu könnärdä Totsk şähärenä baraçaq. Rämil Axmetğaleev söyli:

Şuşı atna axırında yäki ikençe atnağa Totsk garnizonınıñ xärbi prokuraturasına barırğa cıyınam. Anda cinayät eşe materialları belän urında tanışırğa niätlim. Ni öçen Xäbirov belän mondıy xäl buldı, nindi xoquq bozular buldı şuşı sorawlarğa cawap tabarğa kiräk. Häm şunnan soñ ğına nindider çaralar kürergä.

Al'bina Zäynulla

XS
SM
MD
LG