Accessibility links

шимбә, 10 декабрь 2016, Казан вакыты 19:40

Hugo Chavez Rusiä belän duslıq wä qoral küperläre qora


Bügen Rusiägä Venezuela prezidentı Hugo Chavez kilde, xörmätle tıñlawçılar. Anıñ şuşı säfäre barışında ike il arasında zur ğına säwdä kileşüenä ireşeler dip kötelä. Kem kemgä närsä sata soñ? Süz biredä qoral turında bara. Venezuelanıñ sulçı prezidentı Rusiädän höcüm oçqıçları almaqçı. Moñardan tış ul dönyanıñ bu öleşendä üzenä yaña duslar da ezli.

Venezuela prezidentı üz säfären Mäskäwdän tügel, ä İdel buyındağı Volgogradtan başladı. Anıñ biregä Minskidän kilüe, ä anda sovet çorın sağınıp yäşägän Aleksandr Lukaşenka belän dustanä mönäsäbätlär urnaştıruı, Latin Amerikasında "ikençe Fidel" dip atala başlağan Hugo Chaveznıñ simpatiäläre nindi buluı xaqında şik-şöbhä qaldırmıy. Xakimiatkä kilgännän birle ul yaña revolutsiä häm amerikan imperializmına qarşı toru kiräklegen alğa sörä.

Zamanında Venezuelada xärbi fetnä oyıştırğan, şunnan soñ törmädä dä utırıp çıqqan Chaveznıñ Rusiä säfäre üz yuğarı noqtasına prezident Putin belän oçraşuda kütäreläçäk. Alar berençe märtäbä genä oçraşmıy, Chavez Mäskäwdä inde ber bulıp kitkän ide. Xäzer ikeyaqlı duslıq wä xezmättäşlekne yaña eçtälek belän tulılandıru bara. Rusiä başqalasında Venezuela prezidentı üz qorallı köçläre öçen 30 höcüm oçqıçı häm şul uq sanda xärbi boralaq alu turında kileşü imzalarğa cıyına. Rusiä saqlanu ministrı, vitse-premyer Sergey İvanov süzlärenä qarağanda, şuşı kileşü ber milliard dollarlıq häm bu Rusiäneñ qoral citeşterü industriäse öçen zur uñış bulıp tora.

Elek Venezuela distä yıllar däwamında bar qoralnı da tönyaqtağı kürşese - Amerika Quşma Ştatlarınnan ala ide. Ämma xakimiatkä Chavez kilep, yaña revolutsiä turında söyli başlağaç, Washington aña zamança qoral ğına tügel, elekkelärenä kiräk-yaraqların satunı da tıydı. Saqlanu ölkäsendäge urıs belgeçe Aleksandr Golts:

"Quşma Ştatlar xäzer Venezuelanıñ hawa köçläre nigezen täşkil itkän F-16 oçqıçlarına kiräk-yaraqlar satudan baş tarta. Monıñ üz säyäsi añlatması bar häm AQŞ baş tartqan soñ Könbatış illäreneñ dä Venezuelağa qoral satuı ikele. Şulay itep anıñ öçen berdänber zamança qoral citeşterüçe bularaq Rusiä genä qala", dip añlata Venezuela prezidentınıñ xäzer bu ölkädä Rusiägä borıluın Aleksandr Golts.

Xärbi oçqıç wä boralaqlar satıp aludan tış Hugo Chavez üz ilendä Kalaşnikov automatın citeşterüne dä başlap cibärmäkçe. Bıltır Caracas Rusiädän alarnı 100 meñne inde satıp alğan ide.

Rusiäneñ, Könbatış radikal dip sanağan Hugo Chavezgä şulay küpläp qoral satuı, Washingtonda tağın da zurraq borçular uayata ala. Şuşı ğämälläre belän Mäskäw Quşma Ştatlarnıñ dönyadağı tä''siren qısrıqlarğa tırışa kebek, di Rusiä başqalasındağı Heritage Foundation üzäge mödire Yevgeni Volk:

"Quşma Ştatlar yoğıntısın çiklärgä tırışqan Rusiä anti-amerikan qaraşlarda torğan illärgä yaqınya. Bu anıñ İran belän xezmättäşlek itüendä, Xämas belän duslaşuında, Kuba häm Süriäneñ Rusiä berektäşläre arasında buluında kürenä. Şuña da Chavezneñ şul rättä buluı mantiqqa turı kilä", di Volk.

İnde äytelgänçä, Venezuela prezidentı Rusiägä Belarus''tän kilde, ä Mäskäwdän ul Vietnam häm İranğa yul totaçaq.

Kärim Kamal
XS
SM
MD
LG