Accessibility links

чәршәмбе, 7 декабрь 2016, Казан вакыты 21:22

"İñ yaxşı rusiäle" Tuqay rayonında yäşi


Matbuğat çaralarında "Rusiäneñ iñ yaxşı keşeläre" digän ensiklopediäneñ 6 öleşe çığaruğa äzerlänüe häm aña Tatarstannan da 4 şäxesneñ täqdim itelüe xaqında xäbärlär buldı. Alarnıñ 3се Qama ar''yağı töbägennän häm isemnären dä iskä töşeräm. İldar Xalikov Çallı xäkime häm şähärne Awropa däräcäsenä kütärü buyınça zur köç quya. Sergey Kogogin KamAZ general'' direktorı häm anıñ zavodları Rusiä külämendä üseş yulı belän bara. "İñ yaxşılar" isemendäge Tuqay rayonınıñ "Qama" citeşterü berläşmäse citäkçese Foat Vildanov ta bar. Älege berläşmä awıl xucalığı produktsiäse citeşterä. Awıl xucalığı soñğı yıllarda şaqtıy tänqit itelä. Ä menä Foat Vildanov ni öçen "Rusiäneñ iñ yaxşı keşese" digän isemgä layıq bulğan? "Azatlıq xäbärçesenä Foat äfände bolay dide:

- "Küçeş çorında citeşterü qüäten keşelärebez köçe belän saqlap qala aldıq. Şuşı näticägä ireşkänbez ikän, aldağı könebez dä ömetle kürenä. Tatarstan awıl xucalığı ministrlığı xezmätebezne kürep, şuşı isemgä täqdim itkännär ikän, räxmät".

Min, "Qama" kooperativı citäkçese Foat Vildanov belän söyläşü barışında, "Xucalıqta niçä meñ duñğız asrala?"-dip soradım. Häm anıñ cawabı şaqtıy ğäcäpländerde. Ni öçen digändä, moda qädär, küpçelek oçraqta duñğız asrap, anıñ iten satıp tabış aluçı kümäk xucalıqlarnıñ yuğarı isemgä layıq buluların işetergä turı kilä ide. Ä monda, ber baş duñğız asramıyça da, Rusiä külämendä tanılğannar. Qama xucalıqlarında sıyır asrıylar, it-söt satalar, igen üsterälär. Bu kooperativ tabiğät''kä şaqtıy zıyan kiterüçe, tatarğa berqädär çit-yat bulğan duñğız asramıyça da tormışnı alıp barırğa mömkin ikänen dälilläde.

Foat Vildanov inde betep, taralıp kilüçe Belous, İl''içevqa, Borovetskiy, Orlovqa kebek urıs awılları pensionerlarına da mömkin qädär yärdäm kürsätä.

Ğafiulla Ğaziz, Çallı

XS
SM
MD
LG