Accessibility links

Кайнар хәбәр

Tatarstan mariları üz Saban tuyların ütkärde


Bu könnärdä Tatarstanda yäşäwçe marilar üzläreneñ Saban tuyların ütkärde. Semig, mari bäyräme dä, qır eşläre betkäç, peçängä äle töşmägän ber arada, yun ayında uzdırıla. Xäzerge waqıtta, milli bäyrämnär, xakimiätlär yärdäme häm maxsus raslanğan plan belän ütkärelgängä kürä, bıyılğı Mari saban tuyı da beraz soñarıp ütkärelde, xakimiätlär oyıştırırğa cay tapqan waqıtta. Şuşı könnärdä, marilap küpläp yäşi torğan Mendeleyvskiy rayonında, milli mari bäyräme Semig ütkärelde. «Mari çibäre» bäygese, cırlı-buyulı tamaşa oyıştırıldı. Mari xalqınıñ milli bäyrämen Semignı ütkärü ğädäte, mäcüsi ata-babalar zamannan kilä. Awıldan awılğa qunaqqa yörü, yegetlärneñ qızlar qarap yörü, tuğannar belän aralaşu ğädäte bulğan. Bolar xaqında bezgä marilarnıñ milli mädäni avtonomiäse räise Anatoliy Terentyev söyläde. Semig bäyrämenä milli aşlar äzerlänä. Xucabikälär mari qoymağın häm pilmänen peşerä, irlär küñelne açı bal belän kütärä. Semig milli cırlardan başqa ütmi ikän. Mari oyışması citäkçese Anatoliy Terentyev «Yandar yandar» cırın üze üq başqarıp kürsätte. Mari oyışması citäkçese Anatoliy Terentyev äytkänçä, Mendelevskiyda ütkän bıyılğı Sämig bäyrämenä Arça, Quqmara, Çallı, Qazan häm Mendeleyevskiy rayonınnan marilar cıyılğan. Xäbärlärdä äytelgänçä, Bäyräm çarası Mendeleyevskiy şähäreneñ stadionında ütkärelde. Anda Tatarstan häm Mari respublikasınnan kilgän fol’klor ansambelläre qatnaştı, «Mari çibäre» bäygese dä ütkärelde. Bäyrämdä Anatoliy Terentyev üze bulmasa da, niçek ütüen belä. Ul bolay dide: «Anda ber küñelsezlek bulğan, ut süngän. Artistlarğa cırlarnı fonogrammasız başqarırğa turı kilgän. Üt sünüe faydağa ğına. Bäyräm bik canlı bulğan». Mendeleyevskiyda ütkärelgän «Mari cibäre» bäygesendä Mendeleyevskiy rayonınnan İrina Malgina isemle mari tutaşı ciñde. Ul häm bäygedä qatnaşqan başqa qızlar da, aş-suga, milli cir-buygä, milli külmäklären kürsätergä tieş buldı. Bu bäygedä 8 qız qatnaşı, dip xäbär itelä. Mari cämğiäte räise Anatoliy Terentyev äytkänçä, böten yäşlär dä milläten belgertergä telämi. Tatarstanda marilar küpme digängä, Anatoliy Terentyev, räsmi sannar kiterde, Tatarstanda - 20 meñläp, Qazanda 3 meñnän artıq, dide, ämma anıñ isäpläwençä, çınlıqta marilarnıñ sanı kübräk. «Yäşlär, telne belsälär dä, üzlären mari itep kürsätergä telämi, ällä oyalalarmı şunda, qızğanıç soñğı waqıtta yäşlär arasında şundıy moda kitte», di ul. Marilarnıñ milli mädäni avtonomiäse, milli xislären onıtmağan keşelär belän eşli, milli çaralar ütkärä. Anatoliy Terentyev äytkänçä, bu Semig bäyrämen ütkärergä Respublikanıñ xalıq icatı metodik üzäge häm Mädäniät ministrlıq ütkärerä yärdäm itkän.

Bikä Timerova

XS
SM
MD
LG