Accessibility links

шимбә, 10 декабрь 2016, Казан вакыты 19:50

Tatar qızına striptiz kürsätü kileşäme?


Tatar qızına şärä kileş biü, yäğni striptiz kürsätü kileşä torğan xälme? “Äye”, “Yuq” dip äytergä aşıqmağız. Başta tıñlap qarıyq.

Därtle çit il muzıkası tawışları. Yalt-yolt kilüçe törle töstäge utlar. Tönge diskotekağa cıyılğan yäşlär räxätlänep küñel aça. Menä säxnägä yarım şärä, näfis gäwdäle yäş kenä ber qız çığa. Küzlär aña tekälä. Törle erotik künegülär yasap xäräkätlänä başlıy ul. Sızğıralar tegeñä, qul çabalar, ”Bravo“ dip qıçqıralar. Küräseñ, oşatalar yäş qıznıñ bolay biüen.

Qayberäwlär striptiz iyünne äxlaqsızlıq, tän satıp yörü belän tiñlilär. Ä qayberäwlär öçen ul yaratqan hönär. Olılar mondıy eşne oyatsızlıq dilär, ä yäşlär aqça eşläw mömkinlege dip sanıy. Äye, fikerlär törle häm qarşılıqlı. Ämma üzläre şul qazanda qaynağan, hönärlären üz tänendä tatığan yäşlär bu turıda närsä uylıy?

21 yäşlek Läylä dä üzenä hönär itep striptiz kürsätüne saylıy. Niçegräk başlanğan anıñ mondıy tormışı? Tıñlap qarıyq.

-Bu eşkä kerep kitergä sine aqça mäsälçäse etärdeme?

- Döresen genä äytkändä, yuq. Aqça kiräklektän tügel, min yegetemä üç itep anda bardım. Bik tä könçe ide yegetem. Işanmıy ide miña, könläşä ide. Berwaqıtnı min dus qızlarım belän diskotekağa bardım häm…şulay eşli başladım.

- Oyalmıysıñmı soñ?

- Anıñ närsäse oyat soñ? Anı bit äle böten keşe dä bii belmi. Min anı sänğät dip sanıym. Üz maturlığımnı üzem beläm, xalıqqa da oşıy dip uylıym. Sızğıralar, qul çabalar, kürenä bit inde oşağanı. Oşamasa, yörmäslär ide.

- Äti-änieñ beläme soñ bu xaqta?

- Yuq, belmilär. Alar ikençe şähärdä. Alarnıñ belülären telämäs idem inde, oyat bulır ide alar aldında. Bu bit minem tormışım, niçek telim, şulay yäşim inde.

-Yegetegez belän xäzerge waqıtta mönäsäbätegez nindi soñ?

- Bez anıñ belän küptän ayırılıştıq inde. Tik ul üze ğäyeple, bik könläşä ide. Äle dä min biegän klublarğa kilep, minem biegänemne qarap kitä.

-Yegetlär dä küp yöri torğandır inde artıñnan?

- Bula inde. Yegetlär dä, olılar da, qartlar da. Xätta qart ir-atlar kiäwgä dä çığarğa täqdim yasıylar. Bezdä bit inde yegetlär maturlıqqa qızığalar. Läkin min andıy törle keşelär belän çualıp yörmim häm eşemä dä sänğät'kä qarağan kebek qarıym. Ul bit inde minem professiäm, şulay itep min aqça eşlim.

- Aqça mäsäläse niçegräk soñ? Yaxşı tülilärme?

-Törle waqıtta törleçä bula inde, qayda çığış yasağanıña qarap. Bay ir-atlarnı kürep alasıñ da inde, kübräk şular yanında bötereläseñ, çönki baylar maturlıqqa aqça jällämilär. Min striptiz iyünne professiä dip sanıym, şul biü belän aqça eşlim üzemä. Aqça, Allağa şöker, citärlek. Miña bik oşıy üzemneñ hönärem.

Oşıy di bit. Xalıq ta yaratıp qarıy di. Üzebezneñ tatar qızı söyli. Närsä bu, demokratiä ğälämäteme, ällä yäşlärneñ yañaça yäşäw räweşe, küñel açu töreme? Bu xaqta başqalar närsä uylıy disezme? Olı yäşlärdäge ber xanımnan sorağaç, “ciränäm, xäşärätlek bit bu” dip, tökerep kitte. Ä ber yeget “striptiz qararğa gel yörim. Matur bit” dip, yılmayıp kitte. Ä busı tağın ber ir keşe fikere.

Bu Läyläne xurlarğamı, xuplarğamı – belmim. Çınnan da qararğa matur. Älbättä min üzem ädäpsez, bötenläy ük çişenep taşlağannı yaratmıym, äz genä qalsın ide inde öslärendä. Läkin uramğa çıqqanda da, plyajğa barğanda da niçek kenä kienä inde. Qaysı waqıtta biş santimetr ğına itäk yäisä bawdan ğına işelgän suda yözü kästüme… Bu striptizdan qaysı cire belän qala? Annan figuralı şuu bar, kiem-salımnarı, ös-başları, iñ başları, billäre bik matur kürenep tora inde. Ä bit millionlağan qarıy, häm televizordan da kürsätälär. Näfis gimnastika da şulay. Ä balet? Kliplar da kürsätälär bit äle, yegetlär belän nişlägänen dä kürsätälär. Härxäldä, yal itä torğan urında, tönge klubta keşe aldında şulay üzeneñ gäwdäsen kürsätep bii ikän, minemçä, bu iñ namuslı yul. Çönki ul tänen kürsätäm dip kürsätä häm kürsäter närsäse bar. Ä menä maşina reklamalıym, yäki menä min diskotekağa kildem, tuğan köngä kildem dip bik ciñelçä kiengän, yäki kürälätä şärä kileş fil'mda töşüçelär alar äxlaqsızraq, çönki alar äytmilär min striptiz dip. Bälki aña üzeneñ gäwdäsen, sının, maturlığın kürsätep, keşelärne şaqqatıru, qul çaptıru, irlärne soqlandıru häm anıñ kiemenä, trusigına aqça tıqtıru läzzäte üzendä bardır. Xatın-qız artist bit ul. Teläsä qaysı cirlären kürsätergä üzläre xaqlı.

Mondıy küreneşlärgä bötenläy qarşı bulğan ir keşelär dä bar.

Tönge klublarğa şärä kileş iyünne min üzem añlamıym da, anı oşatmıy da häm qararğa da telämim. Qız belän yeget ber-bersen öylängäç kenä kürergä tieşlär, tatarlarda bigräk tä. Nindi ğädät inde ul, şärä kileş üz täneñne kürsätü. Bu bit här keşegä dä oyat bulırğa tieş. Min üzebezneñ elekkege çorlarğa qarap soqlanam häm uylanam.

Kürgänebezçä, fikerlär törle. Striptiznı yaratıp qarawçılar da, bötenläy kürä almawçılar da bar. Niçek buldı soñ inde, tatar qızına xalıq qarşında şärä kileş biü kileşä buldımı soñ? Ällä yuqmı?

Annan soñ soñğı arada tatar diskotekası, tatar al'ternativ muzıkası, tatar internetı barlıqqa kilep, üseş alıp kitte bit. Ä tatar striptizı bulamı ikän? Bälki radiotıñlauçılarnıñ bu xaqta üz fikerläre bardır?

Güzäl Ziatdinova

XS
SM
MD
LG