Accessibility links

якшәмбе, 11 декабрь 2016, Казан вакыты 15:04

Qazanda “Sälämätlek” proyektı niçek tormışqa aşırıla?


Pänceşämbe könne Qazanğa Rusiäneñ sälämätlek saqlaw häm sotsial' üseş ministrı Mixail Zurabov kilde. Zurabov belän bergä Qazanğa tanılğan xirurg, Myasnikov isemendäge klinik kardiologiä institutı yöräk-qan tamırları xirurgiäse bülege citäkçese Rinat Aqçurin da kilde. Qazan aeroportında mediklarnı Tatarstan prezidentı Mintimer Şäymiev, respublika premyer-ministrınıñ berençe urınbasarı Rawil Muratov, sälämätlek saqlaw ministrı Qamıl Zıyätdinov häm başqa räsmilär qarşı aldı.

Federal' ministr Tatarstanğa “Sälämätlek” milli proyektlarınıñ tormışqa aşuın tikşerü öçen kilgän. Qazanda Zurabov Töbäqara klinika-diagnostiqa üzägeneñ xirurgiä bülegen açu tantanasında qatnaştı. Ämma aeroporttan soñ ul iñ äwäl respublikanıñ balalar klinik xastaxanäsenä kilde. Anda federal' ministr balalarnıñ däwalanu şartları belän qızıqsındı. Älege xastaxanädä yaña kardioxirurgiä bülegen açu planlaştırıla. Çönki elekke bülek bik tığız xäldä. Bülek mödire Leonid Mirolyubov äytüençä, Tatarstan balalar yörägenä operatsiä yasaw buyınça Rusiädä berençe urınğa çıqqan. Yaña kardioxirurgiä bülegenä 350 million sumlıq zamança cihazlar alınıp, bülekne sentäber ayında açu planlaştırıla. Tatarstannan ğına tügel, başqa töbäklärdän kilgän awıru balalarnı da älege üzäktä däwalaw turına söyläşülär alıp barıla. Operatsiälärne federal' üzäk finanslar dip kötelä. Kardioxirurgiä bülegendä ber operatsiä 150 meñ sum tora.

Bala tudıru xezmätlären dä üzgäreşlär kötä. Kiläse yılda bala tudıru sertifikatları öçen aqça 11 meñ sumğa kütäreläçäk, dip belderde Mixail Zurabov. Meñeşär sum xatın-qız konsul'tatsiälärenä, bala tudıru yortlarına häm ike meñ pediatriä büleklärenä östäläçäk. Tatarstanda “Sälämätlek” proyektınıñ tormışqa aşuı belän ministr şaqtıy qänäğät qalğan. Ä älege proyekt turında tabiplar üzläre ni uylıy? Däwlät yärdämen toyamı alar? Qazannıñ 6 xastxanäsendä eşläwçe xirurg İldus Äxtämov söyli:

Xastaxanägä bu proyektlar bernindi fayda kitermi. Süz belän eş arasında zur ayırma bar bit. Xezmät xaqı kütärelä dip yartı yıl qıçqıralar, ä näticädä 10-15%qa kütärelä dä, wässäläm. Ä xalıqta bar da yaxşı ikän digän fiker tuplana. Säyäsätçelär üzlärenä reyting kütärä şul ğına. Menä ministr äytkän ide bit 1 iyüldän başqa tabiplarğa da xezmät xaqın 10 meñgä kütäräbez dip. Ä kütärdelär barı tik poliklinikalarda eşläwçe maxsuslaşqan tabiplarğa. Äyterseñ alarnıñ eşe bezgä qarağanda kübräk. Bezgä dä kütärdelär xezmät xaqnı. May ayında 10%qa, 200сум östädelär inde. Bu citdi eş tügel bit inde. Menä min, mäsälän, stavka yarım eşlim, monıñ öçen 4.500 sum aqça alam. İkençe kategoriäle xirurg. Tağın şunısı bar, bezdä bit Mäskäw – däwlät eçendäge däwlät şikelle. Anda xezmät xaqları barıber yaxşıraq. Ämma başqarğan eşläre beznekennän ber dä artıq tügel.

Al'bina Zäynulla

XS
SM
MD
LG