Accessibility links

чәршәмбе, 7 декабрь 2016, Казан вакыты 19:31

Saakaşvili sörelgän Abxaz xökümäten Tiflistän Kodori tarlawığına küçerä


Gruziä prezidentı Mixail Saakaşvili Abxaziädän sörelgän Abxaz xökümäte Tiflistän Kodori tarlawığına küçärgä tieş digän qarar çığardı. Gruziä xakimiätläre bu xökümät berdän ber qanunı xökümät dip isäpli. Gruziä Abxaziäneñ barı Kodori tarlawığın ğına kontroldä tota. Küptän tügel bu töbäk başlığı xökümätneñ andağı qorallı törkemnärne qoralsızlandıru häm taratu färmanın ütäwdän baş tartqaç Kodori tarlawığında Gruziä idaräse özelep torğan ide. Abxaziäneñ zur öleşe isä 1993-nçe yılda de facto bäysezlek alğannan birle Tifliskä buysınmıy.

Gruziä bıyıl ciñülärgä, yiçyuğı keçkenä genä bulsa da çiñülärgä qıtlıq kiçerä. Şuña kürä bu atnada Kodori tarlawığında uñışlı ütkärelgän xärbi operatsiäne prezident Saakaşvili il xalqın ruxlandıru öçen ber säbäp itep kütärergä tırışa.

Pänceşämbe könne bar ilgä kürsätelgän television möräcäğätendä Saakaşvili Kodori tarlawığın Emzar Kvitsiani ğisyançılarınnan tiz arada häm çağıştırmaça az yuğaltular belän tazartqan Gruziä xakimiätläre möhim sınaw ütte dide häm bu operatsiäne bik zur uñış dip bäyäläde.

Saakaşvilinıñ bu operatsiädän soñ çiñelräk sulıy başlawı sizelä ide diärgä mömkin. Kodori tarlawığı çınnan da Gruziä öçen bik zur ähämiätkä iä. Ul Gruziädän ayırılırğa teläwçe Abxaziäneñ näq üzägenä ütep kerä. Şul uq waqıtta anıñ Tiflis öçen faydalı buluı cirle xakimiätneñ Tifliskä buysınu-buysınmawına bäyle.

Şuña kürä Saakaşvili bu atnada Kvitsiani köçlärenä qarşı uñışlı ütkärelgän operatisäne tizräk säyäsi initsiativa öçen faydalanırğa tırışa.

Comğa könne ul Gruziä tarafınnan tanılğan häm yaqlanğan, ämma Abxaziädän quılğan Abxaz xökümätenä Tiflistän Kodoriğa küçenergä quştı.

"Bez Abxaz xökümäte wäkillären Korodi tarlawığına küçerergä digän qararğa kildek. Anda alar Gruziä xakimiätläreneñ tulı yurisdiksiäsenä iä bulaçaq häm töbäkne tulısınça kontrolgä alıp tormışnı caylıyaçaq, tözekländerü eşlären başlıyaçaq" dide Saakaşvili.

Ul şulay uq Suxumidağı Abxaz separatist xakimiätlärenä Gruziäneñ Kodorinı moñarçığa qarağanda nığraq itep üz qulına alaçağın citkerde.

"1993 yıldan birle berençe märtäbä xökümät bezneñ Abxaziäneñ bu öleşendä tulısınça Gruziä yurisdiksiäsen urnaştıra häm Abxaziäneñ näq üzägendä, Abxaz cireneñ bik möhim öleşendä Gruziä konstitutsiäsen torğıza" dide Saakaşvili.

Ämma Saakaşviliğa bu ciñel bulmıyaçaq. Üzäk xakimiätlär tarafınnan iğtibar sizmäwçe cirle xalıqnıñ ışanıçın yawlarğa kiräk bulaçaq. Citmäsä Kodori awılları üzäktän yıraqta häm tawlı cirlärdä, nizağ çığu mömkinlege zur bulğanm urında urnaşqan.

Tiflistäge Kafkaz tınıçlıq, demokratiä häm tärräqiät institutı mödire Gia Nodia sörgendäge Abxaz xökünmäte turında "Bu ul qädär ük yuridik problema tügel, xikmät anıñ eşendä berär närsä üzgärüdä, anıñ Kodori xalqı belän mönäsäbätläre nindi buluda da tügel. Çönki moñarçı legitim Abxaz xökümäte Kodorida populyar bulmadı. Şevardnadze çorında alarnı Kodor tarlawığınnan qıynap qaytaralar ide" dide.

Saakaşvili Kodori tarlawığında cirle hawa alanın häm töbäkneñ administrativ üzäge belän totaştıruçı yulnı tözekländerergä wäğdä birde.

Abxaziä isä Gruziäneñ Kodoriğa sörelgän Abxaz xökümäten kiterü niätenä qarşı köç qullanaçağın belderde. Bäysezlek yaqlı Abxaz xökümäteneñ tışqı eşlär ministrı Sergey Şamba Kodoriğa sörelgän xökümät kiterelsä Abxaziäneñ köç qullanudan başqa çarası qalmıyaçaq dide. Abxaziä prezidentı Sergey Bagapş ta İnterfax agentlığına Gruziäne elekke kileşülärne bozuda, suğışqa taba adım yasawda ğäyepläp, Abxaziäneñ xärbi köçläre suğış äzerlege xälenä kiterelde dip belderde.

Naif Aqmal, Praga.
XS
SM
MD
LG