Accessibility links

Кайнар хәбәр

Çallıda suğışqa qarşı piket


28 iyül könne Çallıda Fälestin häm Livanda barğan suğış xäräkätläre uñayınnan piket ütkärelde. Älege çaranı piket dip atawı da qıyındır, çönki şähärneñ 6 bistäsendä cıyılğan 20-25 keşeneñ qullarında bernindi şiğar'lär dä, öndämälär dä yuq ide. Monıñ säbäbe nidä? Soraşular şunı kürsätte, şähär xakimiäte piket uzdıruğa röxsät birmägän häm kilgän keşelär suğışqa qarşı yazılğan öndämälären alıp kilmägännär. Älege piketnı Çallı TİÜe oyıştıra, digän süzlär buldı. Läkin bu oyışmanıñ da, başqa cämğiät - firqäläreneñ dä citäkçeläre şuşı çarada kürenmädelär, xalıqnıñ kemnär tarafınnan cıynaluı bilgesez qaldı. Şuşı 2-3 distä keşe arasında urıslar da, yähüdlär dä, älbättä tatarlar da bar ide. Piketqa kilgännär mondıy fikerdä:

Familiäse Stolyar. Namuslı yähüd bularaq suğışqa qarşı näfrätemne belderäm. Berdıçevski digän iptäşem belän xat ta cibärdek, anda äyttek : İzrail' xalqı, Sezneñ belän milli xıyänät firqäse idärä itä, bu xakimiätne alıştırırğa kiräk. Ğomumän alğanda, sivilizatsiä suğışı bara, yäğni, Könbatış häm möselman dönyası. Yuq, min alay sanamıym. Suğış mölkät bülü buyınça yarlılar häm baylar arasında bara. Şuşındıy qu büleneş Tatarstanda häm Rusiädä dä bara.

Faiq Taciev, tatar xalqınıñ Milli mäclese deputatı. Häm başqalar fikere:

"Min Livan xalqın yaqlap kildem. İzrail' agressiäsenä qarata näfrät belderäm. Ber genä millätneñ dä üzen başqalardan östen quyarğa xaqı yuq."

Äytep kitkänemçä, piketqa röxsät birelmäde, didem. Şuşı küreneşkä aq yaulıqlı äbi - apalarnıñ mönäsäbätläre mondıy:

"Mäskäwdä, İzrail'neñ üzendä suğışqa qarşı piketlar bara. Ä menä Çallı xakimiäte piket ütkärergä röxsät birmäde."

Älege çara tınıç qına uzdı, köç xezmätläre artıq küzgä çalınmıyça, yıraqtan ğına küzätep tordılar.

Çallı, Ğafiulla Ğäziz

XS
SM
MD
LG