Accessibility links

җомга, 9 декабрь 2016, Казан вакыты 14:50

Salawat konsertları qaharmanı Şüräle bulaçaq


Qazanda cırçılar bik küp, yäş, qart, xalıq cırların başqaruçılar, zamança estrada pop yoldızları, klassik opera ariälären cırlawçılar säxnädä dä, tormışta da köndäşlek itälär. Aralarında bik osta cırlawçılar häm kör tawışlıları da bar. Ä ike öç atna, xätta tağın da ozağraq ber zalda konsertlar quyıp, audіо tasmalarda keşelärne cälep itüdä köndäşe bulmağan, şulay uq ekranda häm radio efirda tansıq qunaq Salawat ber genä. Menä 18 tapqır ul avgust ayında konsert programmaları belän Qazannıñ iñ abruylı säxnäsendä çığış yasıy. Äytülärenä qarağanda, 7 avgusttan 17 qädär däwam itäçäk bıyılğı konsertta biletlar inde satılıp betkän, ämma ğädät buyınça Salawat jurnalistlar belän oçraşa. Bu yulı ul 2-3 distä qäläm, mikrofon häm telekamera iälären üzeneñ yañaraq qına tözelgän zinnätle ofisında cıydı.

Ğadel Qutuy uramınıñ Tattransgaz berläşmäse urnaşqan öleşendä, ayırım alğanda Voloçyaev tıqrığında bik zatlı ixata eçendä ber keçkenä Salawatstan däwläte oyışqan diärgä bula. Uramda uq keçkenä baqça, çäy eçü poçmağı, ike qatlı binağa kergän här keşe ayaq kiemnären salıp, çista kelämnär buylap eş häm repetitsiä bülmälärenä kerä. Ber urında istälekle büläklär, muzıka qoralları, büre qaraçqısı, büre häm ayu tireläre, tutıy qoş üzençä tawış birä, qabul itü bülmäsendä telefon çıltırağanda qıñğıraw tügel, ä därräw qul çabular tawışı işetelä. Yumor xisle Salawat bu oçraşunı bik citdi alıp bardı. Soñğı yılda başqarılğan eşlär, yaña proyektlar bik küp. Xäzer Salawat Rusiä balalar fondınıñ Tatarstan büleklären citäkli. Anıñ balalarğa yärdäm itü plannarı zurdan, xätta Qazan yanında ber maxsus awılnı tergezep anda bik şäp yortlar tözetep, yätim balalarnı üz ğailäsenä alıp üsterüçelärgä birmäkçe. İcatta da tınıç qına utırmıy.

Uzğan yılda ul 180 läp konsert birgän, yäğni här ike könneñ bersendä säxnägä çıqqan. Şul isäptän Seberdäge, Kön'yaktağı, Tön'yaktağı ölkälärgä säyäxät itü könnäre dä bik küp bulıp çıqqan. Ğädättä Salawat konsertlarnı kilüçelär zalğa şığrım tula. Şunı isäpkä alğanda uzğan yılda ğına da şäxsän Salawat çığışların qarawçılar sanı 300 meñ keşegä yaqınlaşqan.

Ä bıyılğı avgust konsertınıñ töp mäğlümatı Qazan uramnarındağı iğlannardağı 4 süzgä sıyıp betä. Salawat 7-17 avgust, UNİKS. Äye, bıyılğı konsertlar Qazan universitetınıñ tamaşalar zalında ütäçäk. Çönki Qamal teatrı binası remontlana. İke säğät buyı jurnalistlar Salawatnı estrada, cır, topmış, millät häm säyäsät turında soraştılar. Ğädättägeçä, bıyılğı konsertlarnıñ üzençälege qızıqsındırdı. Salawat monıñ seren çişmäde, ämma töp ideyäne äytte. Bıyıl Tuqay, Cälil , tatar teatrı yubileyları, Şuña kürä bıyıllı programmada töp qaharman Salawat tügel, tatar äkiätlärennän Şüräle bulaçaq. Şüräle poeması icat itelgängä dä 99 yıl bulğan ikän. Kiläse 100 yäşen tutıraçaq şüräle Tatarstan häm tatar tormışı belän qızıqsınıp, Salawat belän bergä cırlar ta yöriäçäk. Şüräle obrazın tudıruçı, Yädkär Xabibulinnañ satira ölkäsendäge ostalığın belüçelär çamalıydır. Bu Şüräle awızınnan işeteläçäk süzlär qayberäwlärgä oşamasqa da mömkin. Qısqası, tabiğät, anı saqlaw,ruxi tormış turında baraçaq bu konsert programmasınıñ xikäyäse , ä cırları arasında 10 artıq yaña cırları da 'ulaçaq. Ansı nindi cırlar bulası bielgesez qaldı. Qazanğa Mäskäwdän zur artistlarnı çaqırunı tänqit itte. Xäzerge yäş cırçılar, ğämsez häm icadi torğınlıqta yäşäwläre turında söyläde.

Salawat belän oçraşu menä şulay ütte. Ul üzen qüätle cämäğät eşleklese häm eşquar itep kürsätte. Ä cırları UNİKS sarayında yañğırıy häm audіо, video yazmalarda teläsä qaya barıp citä ala. Häm älbättä radio dulqınnarında.

Rimzil Wäli

XS
SM
MD
LG