Accessibility links

шимбә, 3 декабрь 2016, Казан вакыты 12:39

Yaqın Könçığışqa çişeleş ömete bar


Xalıqara cämäğätçelekneñ Yaqın Könçığışta köç qullanunı tuqtatırğa digän taläbe köçäyä bara. Bigräk tä yäkşämbe könne, İzrailneñ Libannıñ Qana şähärenä höcüme häm anda kimendä 54 keşeneñ häläk bulğanınnan soñ 3 atna däwam itkän qan qoyışqa noqta quyu kiräklege - köntärtibendä. Töbäktä, xärbi çaralar başlanğannan birle inde ikençe tapqır AQŞ däwlät sekretare Condoleezza Rice bulıp kitte.

Häläk bulğan 60qa yaqın keşeneñ yartısınnan kübräge balalar, häm İzrail bu faciğa öçen ğafu ütende. Xärbi çaralar digännän İzrail atışlarnı 48 säğätkä tuqtatıp toraçağın belderde... Ämma şul uq waqıtta tınıç xalıqnıñ häläk buluı öçen İzrail Xizbullanı ğäyepläde, Xizbulla – tınıç xalıq yäşägän cirdän İzrailgä ut açırğa tieş tügel, dielde.

Höcümne Libanda häm şunda uq böten dönyada kisken täñqitläp çıqtılar. BMO İminlek Şurası yäkşämbe könne ğädättäntış utırışqa cıyılıp, Qanadağı xällärgä ükeneç belderde:

"İzrail saqlanu köçläreneñ, könyaq Libandağı Qana şähären utqa totuı, näticädä bik küp keşeneñ ülüe häm yaralanuı İminlek Şurasın tetränderä."

BMO general sekretare Kofi Annan İminlek Şurasına köç qullanunı tuqtatunı taläp itkän rezolüsiä ölgesen küptän täqdim itkän ide. AQŞ Däwlät Sekretare Condoleeza Ricenıñ bügen Waşingtonğa yulğa çığır aldınnan Yerusalimda äytkän süzläre ömetle yañğradı:

"Kire Waşingtonğa min, köç qullanunı mömkin qadär tizräk tuqtatırğa häm ozın möddätle çişeleş kiräk digän uylar belän qaytam. Bolarnıñ ikesenä dä bu atnada ireşep bulır dip ışanam."

Rice süzlärenä qarağanda, Waşington İminlek Şurasına 3 öleştän torğan plan täqdim itäçäk.

-köç qullanunı tuqtatu -nizağqa ozın möddätle säyäsi çişeleş tabu -häm Libanğa xalıqara xärbi köçlär kertügä röxsät alu

İzrail dä bügen üz fikeren bäyän itte. Saqlanu ministrı Ämir Perez, köç qullanunı xäzer tuqtatu – Xizbullağa faydağa bulaçaq, dip belderde. İzrail Libanda Xizbulla ğısyançılarına qarşı çaraların köçäytergä cıyına.

Alsu Qormaş
XS
SM
MD
LG