Accessibility links

якшәмбе, 4 декабрь 2016, Казан вакыты 23:36

Kremldä Medvedev kürgäzmäse açıldı


2 avgust könne Kreml'däge galereya zalında respublikanıñ Milli sänğät muzeynıñ filialında, ataqlı fotograf Mixail Medvedevnıñ kürgäzmäse açıldı. Bu kürgäzmä “TAİF” nıñ 10 yıllıq häm fotografnıñ 60 yıllıq yubileyına bağışlanğan. Mixail Medvedev ul - Rusiäneñ däwlät premiäse lawreatı, Rusiäneñ atqazanğan mädäniät xezmätkäre, Tatarstan premiälärenä, “Bällür qäläm”gä , dizayn ölkäsendäge “Serebryänıy luçnik” diplomına iä keşe.

Bu kürgäzmädä 250 dän artıq törle janrdağı fotolar quyılğan. Fotolar Mixail Medvedevnıñ üze äytüençä, başta 1500 foto arasınnan saylanıp alınğan.

Fotolar arasında “Bezneñ babay” dip isemlängän Tatarstan Prezidentı Mintimer Şäymiev portretınnan başlap Qazannıñ , respublikanıñ yözen çağıldırğan anıñ törle poçmaqları, xalqı töşerelgän fälsäfi mäğnägä iä unikal' fotolar bar. Anda Rusiä Prezidentı Vladimir Putinnıñ Sabantuyda qatıqtan täñkä ezläp tapqan mizgele dä , çülmäk watarğa cıyınğan küzläre bäyle Boris Yel'sin da , Marsel' Sälimcanov ta , Alsu Ğäynullina häm başqa fotolar da bar .

Şulay uq kürgäzmägä kilüçelär Afrikadağı Saxra çüleneñ tabiğäte, xalqı da , Misır, Marokko , Liviä çülläre dä, Kamaz maşinasınıñ Parij- Dakar maşina yarışlarında qatnaşqan küreneşläre çağıldırılğan fotolar belän tanışa ala. Bik küp urın alğan törle din turındağı fotolar. İslam dine turındağı fotolar ayırım ber urın alıp tora. Mixail Medvedev üz ğömerendä cir şarınıñ yartısın diärlek äylänep çıqqan keşe. Fransiä Bel'giä , Mongoliä, Senegal, İspaniä, Braziliä häm başqa illärneñ tormışı, könküreşe , tabiğäteneñ bik qızıqlı mizgellären totıp qala alğan fotograf.

Mixail Medvedev fotograf qına tügel. Anıñ 60 yıllıq tormış yulı Ukrainadan başlanıp kitä. Mäskäwdä kinematografiä institutınıñ rejisserlıq bülegendä belem ala. Üzäk televideniedä eşli , anda 14 telefil'm , 15 kinofil'm töşerä. 1974 yıldan anı Tatarstanğa Kamaz tözeleşenä çaqırıp alalar.1985 yıldan ul “TASS ” mäğlümat agentlığınıñ fotokorrespondentı bulıp eşli.

2 avgust könne Kreml'däge galereya zalında urnaşqan respublikanıñ Milli sänğät muzeye filialında, Mixail Medvedevnıñ fotokürgäzmäsen açu tantanasına bik küp jurnalistlar, kiñ cämäğätçelek cıyılğan ide. Tantana barışında Mixail Medvedevqa mädäniät ministrı urınbasarı Aydar Ğaynetdinov, anıñ icatın bik zur bäyälägän häm bik cılı süzlär yazılğan Premyer- ministr urınbasarı, mädäniät ministrı Zilä Wälievanıñ “Räxmät xatı”n tapşırdı. Tantanada TR rässamnar berlege räise Abrek Abzgil'din qotlaw süzlären citkerde häm yubilyarnıñ iñ yaqın dusları anı täbriklädelär. Tantananı, kürgäzmäneñ xucabikäse, TR sänğät muzeyınıñ citäkçese Älfiä Tutayıva alıp bardı. Azatlıq radiosına ul bolay dide : Bu kürgäzmä bik kiräkle. Çönki monda ul böten Tatarstannıñ tormışın, härber çorın kürsätä. Härber räsemendä Qazannı tanıybız , Tatarstannıñ xalqın tanıybız.

Milli muzeynıñ general' direktorı urınbasarı Rafael' Wäliev söyli: “Qayda ğına barmağan, närsä genä kürmägän . Anıñ kürgän närsälären sänğati yağınnan bik yaxşı kürsätä belüe- bik möhim . Mondıy kürgäzmälär bezne böten dönyada tanıtırğa tieş”

Rässam Grigoriy Eydinov söyli: “Ul töşergän fotolar rässam küzlegennän çığıp eşlängän. Mixail Medvedev ul -keşelärne teträndererlek ostaz ”

Finlyandiädän üzeneñ tormış iptäşe belän kilgän Xäydär Säyetbattalov.

“Kompozitsiä yağınnan bik äybät eşlängän. Törle illärdän bik siräk dokumentlar bar. Törle illärneñ, törle xalıqlarnıñ tarixları kürenä. Ul zur quanıç häm belemlek. Bu bik qäderle kürgäzmä” .

Tantana azağında süzne yubilyarnıñ üzenä birdelär. Ul süzen qısqa ğına totıp , Tatarstan xökümätenä räxmäten belderde.

“Fotografiä ul şundıy janr , anıñ turında söylärgä kiräkmi . Anı kürergä kiräk. Ul yä bar, yä yuq. Jurnalist küzlegennän töşerelgän foto ul millionlağan keşelärne jurnalist- fotograf küzlege aşa kürergä mäcbür itä. Minem kürgäzmäm şuşı matur, mähabät, respublikanıñ üzäk zalında ütüenä bik şatmın, häm respublika wäkillärenä bik räxmätlemen”dide Mixail Medvedev.

Kreml' galereyasında bu foto-kürgäzmä 20 avgustqa qädär eşläyäçäk.

Bügenge köndä M.Medvedev respublikadağı “TAİF” kompaniäseneñ “FOTO-ART” oyışmasın citäkli. Uzğan yıl ul FOTO-ART” yärdämendä Qazannıñ 1000 yıllığına bağışlap, üze töşergän fotolardan torğan 4 kitap näşer itte.

Mälikä Basıyr

XS
SM
MD
LG