Accessibility links

якшәмбе, 11 декабрь 2016, Казан вакыты 12:59

Tatarstan-Äzerbaycan elemtäläre nığıy


Bu atna Tatarstan belän Äzerbaycannıñ iqtisadi elemtälären nığıtudan başlanıp kitte. 1 avgust könne respublika premyer-ministrı Röstäm Minnexanov citäkçelegendäge delegatsiä Baqıda bulıp qayttı. Anda ike aradağı iqtisat, fän, sänğät tarmaqlarındağı elemtälärne kiñäytü turında söyläşülär alıp barılğan. Äzerbaycanda Tatarstan delegatsiäseneñ räsmi säfär ber genä kön däwam itügä qaramastan, anıñ näticäläre şaqtıy sallı. Röstäm Minnexanov Äzerbaycannıñ premyer – ministrı belän ike aradağı iqtisat, fän, sänäğät tarmaqlarındağı elemtälärne kiñäytü turında söyläşülär alıp bardı, Äzerbaycannıñ prezidentı İlham Aliev belän oçraştı. Räsmilär üzara xezmättäşlek turında oçraşıp söyläşsä, icatçılar isä Baqı häm Äzerbaycandağı millättäşlärebez iğtibarına zur konsert täqdim ittelär. Tatarstan belän Äzerbaycan arasında elemtälär yıldan – yıl nığıy bara. Bu mönäsäbätlärneñ tiränäyüenä Baqıdağı tatar cämğiäteneñ häm Qazanda oyışqan Äzerbaycan milli – mädäni möxtäriäteneñ dä uñay tä'sire bar. Comğa könne älege möxtäriätneñ räise Almursal Mursal oğlı Manafov Azatlıqnıñ Qazan studiäsendä qunaqta buldı. Almursal äfände inde 25 yıl Qazanda tora ikän. Zamanında Sovet armiäsenä çaqırılıp, ul Qazan Kirmänendä xezmät itkän. Şunna soñ Qazan däwlät universitetınıñ yuridik fakul'tet tämamlap, ozaq qına yurist bulıp eşlägän. Ä bügenge köndä ul ber şirkät citäkçese bulıp tora ikän. Almursal äfände Äzerbaycan möxtäriäte, Tatarstan-Äzerbaycan mönäsäbätläre, respublikadağı äzerbäycannarnıñ niçek yäşäwe turında söyläde.

Qazanda Äzerbaycan milli – mädäni möxtäriät 1988 yılda oyıştı. Ul waqıtta bez studentlar ğına idek äle. Cämğiätne oyıştıru ideyäse, tatar yäşläre belän bergä Näwrüz bäyrämen uzdırğanda tudı. Ul çaqta bezneñ oyışma “Oğuz” dip atala ide. “Oğuz” äzerbaycan telendä törki xalıqlarnıñ ber käweme. Möxtäriätneñ töp maqsatı- Tatarstan cirendä yäşäwçe äzerbaycannarnıñ berläşep milli häm dini bäyrämnärne bergäläp uzdıru, telebezne, mädäniätebezne, ğöref-ğadätlärebez saqlap qalu. Äytik, här yılnıñ 22 mayında bez Äzerbaycannıñ bäysezlek könen bilgeläp ütäbez, şulay uq Äzerbaycannıñ barlıq dini häm däwlät bäyrämnären uzdırabız.

Ä menä Tatarstan häm Äzerbayjan arasında üzara tağın nindi bäyläneş bar? - Bu mönäsäbättä şunsı soqlandıra. Menä şuşı atnada ğına Tatarstan premyer-ministrı citäkçelegendäge räsmi wäkilçelek Äzerbaycanda bulıp qayttı. Minemçä, soñğı waqıtta Tatarstan häm Äzerbaycan arasında bik zur xezmättäşlek bara. Bu bezneñ xalıqlarnıñ ber – bersenä yaqın buluın tağın ber qat dälilli. Häm kiläçäktä hiçşiksez bezneñ aradağı iqtisadi häm mädäni mönäsäbätlär üseş alaçaq.

Gölnaz Şäyxetdin

XS
SM
MD
LG