Accessibility links

шимбә, 3 декабрь 2016, Казан вакыты 01:38

570nçe kvartal batalonı wäkilläre uñışı


Ufadağı “570 nçe kvartal batal'onı” dip atalğan cämäğätçelek oyışmasınıñ respublika häm Ufa şähäre xakimiätläre belän alıp barğan köräşe xaqında sezne härdaim tanıştırıp torabız, xörmätle tıñlawçılar. Menä şul 570 nçe kvartal batal'onı wäkilläre räsmi xaqimiätlär belän alışta zur ğına uñışqa ireşte.

İnde xäbär itelüençä, 570 nçe kvartal batal'onı dip atalğan cämäğätçelek oyışmasına Ufada cimerelergä tieşle iske yortlarnıñ fatirları xucaları kerä. Ufada Başqortstan Prezidentı qarşındağı iñ qüätle tözeleş fondı Frunze uramındağı iske yortlarnı cimerep, bik zatlı yaña yortlar tözergä cıyına. Ämma iske yortlar xucalarına bu fond citäkçelege bik az mäydandağı fatirlar öçen genä kompensatsiä birä. Menä şuña riza bulmıyça, iske yortlar xucaları ike aydan artıq inde köräş alıp bara.

Älege köräştäge nıqlıq häm ezmä-ezleklelek 570 nçe kvartal batal'onı törkemenä kerüçelärgä uñışlar da kiterä başladı. Şuşı törkemneñ citäkçese Svetlana Puçkova üzläre öçen küñelle bulğan yañalıq xaqında xäbär itte. Başqortstan Respublikasınıñ Däwlät arxitektura-tözeleş küzätüe oyışması 570 nçe kvartalda tözeleş eşlären alıp baru qanunsız eşlänä dip, Başqortstan Prezidentı qarşındağı tözeleş fondına kürsätmä cibärgän häm şuşı xilaf eş öçen ştraf ta tülärgä boyırğan.

Svetlana Puçkova bu qararğa quanıçların belderde häm kiläse atna başınnan uq, Başqortstan Prezidentı tözeleş fondına qarşı nıqlı qarşılıq çaraların köçäytä başlayaçaqların äytte. “Xäzer bez aldağı adımnarıbız xaqında xoquq belgeçläre, advokatlar belän kiñäşläşülär alıp barabız”, - dide 570 nçe kvartal batal'onı citäkçese.

Şulay da Svetlana Puçkova bik tiz genä ciñügä ireşäçäklärenä ömet totmıy. “Başqortstan Prezidentı qarşındağı tözeleş fondı zur monopolist häm anı respublika räsmi citäkçelege nıq yaqlıy, - di ul. – Ämma bez dä axırğaça köräşäçäkbez häm ğadi xalıqnıñ mänfägat'lären yaqlarğa tırışaçaqbız”.

XS
SM
MD
LG