Accessibility links

чәршәмбе, 7 декабрь 2016, Казан вакыты 13:36

Uqıtuçılar yıllıq kiñäşmäsenä äzerlänä


Avgust ayı keşelärgä cäyneñ soñğı ayı bularaq bilgele bulsa, mäğärif xezmätkärläre öçen bu ay yaña uqu yılına äzerlek häm yıl sayın uza torğan traditsion avgust kiñäşmäse waqıtı. Bıyıl ul qayçan häm niçek ütäçäk?

Respublika mäğärif xezmätkärläreneñ avgust konferensiäse yıl sayın Tatarstannıñ berär rayonında ütä. Anda Fän häm mäğärif ministrlığı xezmätkärläre, respublikanıñ barlıq töbäklärennän mäğärif oyışmaları citäkçeläre, xakimiät wäkilläre, uqıtuçılar, tärbiäçelär cıyıla. Anda kiläse uqu yılına quyıla torğan maqsatlar, kiläçäkkä plannar tikşerelä, mäğärif tarmağındağı yañalıqlarnı tormışqa aşıru xaqında söyläşülär alıp barıla. Bıyılğı kiñäşmä respublikanıñ Täteş şähärendä 9-10 avgust könnärendä uzaçaq. Anıñ teması - Mäğärif – milli üseşneñ östenlek birelgän yünäleşe. Şuşı xaqta töp çığışnı tatarstannıñ Fän häm mäğärif ministrı Räis Şäyxelislamov yasayaçaq. Bu turıda fikerläşü 10sında ütäçäk plenar utırışta bulaçaq. Ä 9nda isä, kiñäşmädä qatnaşuçılar seksiälärdä eş alıp baraçaq. Bıyıl seksiälär 5 bulaçaq. Alarda süz Mäğärif däwlät proyektı, anı respublikada tormışqa aşıru, munitsipal’ mäğärif sisteması, hönäri belem birü problemaları tikşereläçäk. Seksiälärneñ eşen ministrlıqnıñ häm respublikanıñ Mäğärifne üsterü institutı wäkilläre citäkläyäçäk. Ber seksiä isä 8 avgust könne ük Qazanda ütäçäk. Anıñ qısalarında İdeya texnoparkında hönäri belem birüne üsterü xaqında söyläşü uzaçaq.

Şunısı da qızıqlı, respublikanıñ Fän häm mäğärif ministrlığı kiñäşmäne ütkärüneñ ğädäti ısulları belän genä çiklänmiçä, zamança texnologiälärne dä eşkä cigärgä bulğan. Bıyıl oyıştıruçılar arasında internet-konferensiäne ütkärüne dä planlaştıra ikän. Bu xaqta bezgä ministrlıqnıñ mäğlümät üzägendä xäbär ittelär. Xäzerge köndä ministrlıqta häm, älbättä inde, zur cıyılış uzaçaq Täteş rayonında qızu äzerlek eşläre bara.

Gölnaz İlgizär

XS
SM
MD
LG